|
 Bu
yaxınlarda bir şad xəbər Şamaxı pedaqoji ictimaiyyəti və
idmançılarının sevincinə səbəb oldu. Belə ki, Şamaxı
Rayon Təhsil Şöbəsində 40 ilə yaxın bədən tərbiyəsi və
idman üzrə metodist vəzifəsində çalışan vətən
təəssübkeşli Əhliman Qəhrəmanov Azərbaycan
Respublikasının fəxri bədən tərbiyəsi və idman işçisi
fəxri adına layiq görüldü.
1946-cı il dekabrın 16-da Şamaxı şəhərində anadan olmuş
Qəhrəmanov Əhliman Əliş oğlunun həyat yolunun olduqca
zəngin, maraqlı və rəngarəng olmasının bir səbəbi
uşaqlıqdan taleyini idmana həsr etməsi ilə bağlıdır.
O vaxtlar S.M.Qənizadə adına şəhər 1 nömrəli orta
məktəbin VII sinfində oxuyan Ə.Qəhrəmanovun idmana olan
marağını hiss edən təcrübəli bədən tərbiyəsi üzrə
müəllim-məşqçi Həsənağa Xudaverdiyev onu güləş dərnəyinə
cəlb etdi. Gərgin məşqlərdən sonra sərbəst güləş növündə
sinif yoldaşlarından seçilən yeniyetmə Əhliman
yarışlarda xüsusən fərqlənir, idman dərəcələrini
artırır, yeni-yeni uğurlar qazanır.
Çox keçmir ki, gənc Əhliman həyatını birdəfəlik idmana
bağlayır. Beləcə gərgin məşqlər, arzu və məqsədlər
qol-qanad açır, uğurlara zəmin yaranır.
1966-cı ildə Azərbaycan Dövlət Bədən Tərbiyəsi
İnstitutunun pedaqogika fakültəsinə daxil olmaqla gənc
Əhliman üçün böyük arenaya meydan açılır. Əsl həyat da
buradan başlanır.
Tələbələrin sərbəst güləş üzrə yarışlarında dəfələrlə
1-ci yer tutan Əhliman Qəhrəmanov 1968-ci ildə SSRİ
idman ustası normasını müvəffəqiyyətlə yerinə yetirir.
Bundan sonra gənc Əhliman daha da şöhrətlənir və
Şamaxıda məşhur bir idmançı kimi sevilir.
Kənd Könüllü İdman Cəmiyyətində 25 ilə qədər idmanın
sərbəst güləş növü ilə məşğul olan Ə.Qəhrəmanov Bakı,
Gəncə və Sumqayıt şəhərlərində keçirilən mötəbər
yarışlarda 1-3-cü yerləri tutmaqla vətən təəssübkeşli
oğul kimi Şamaxı idmanını daha da şöhrətləndirir. Bundan
sonra Ə.Qəhrəmanovun idman sorağı SSRİ-nin digər
şəhərlərindən gəlməyə başlayır.
Belə ki, tanınmış Azərbaycan idmançısı Ə.Qəhrəmanovun
Leninqrad (indiki Sankt-Peterburq) şəhərində İvan
Poddubinin şərəfinə keçirilən yunan-Roma güləşindəki
turnirdə mükafatlandırıcı yer tutması və qiymətli
mükafat alması onu bir məşhur idmançı kimi təsdiqlədi.
Şamaxıda Əhliman müəllim artıq bir məşqçi kimi gərgin
çalışır, gələcəyin məşhur idmançılarını yetişdirməyə
ciddi səy göstərir.
O, Şamaxıda adlı-sanlı idmançılar - dünya çempionları
Bahadur Mirzəliyev, Telman Xəlilov, Qahir Mahmudov,
Telman Məmmədyarov və Qüdrət Məmmədyarov kimi SSRİ idman
ustalarının yetişməsində də az əmək sərf etməmişdir.
Əhliman müəllimin həyat salnaməsində 1969-cu ildən
pedaqoji fəaliyyətə başladığı Leninabad kənd orta,
Şamaxı Kənd Təsərrüfatı, Şamaxı Tibb Texnikumu və uzun
illər şəhər 1 nömrəli orta məktəbində işlədiyi dövrlər
tanınmış idmançının ən gözəl, rəngarəng al-əlvan
günlərinin müjdəçisi olmuşdur.
Əhliman Qəhrəmanovun tanınmış bir idmançı kimi
səs-sorağı rayon rəhbərliyinin diqqətindən yayınmır və
o, 1975-ci ildə Şamaxı Rayon Xalq Maarif Şöbəsinə
ixtisası üzrə metodist təyin olunub.
Əhliman müəllim həm də ehtiyatda olan zabit kimi 20
ildən çoxdur ki, Şamaxı Rayon Təhsil Şöbəsində
çağırışaqədərki və fiziki tərbiyə işlərini əlavə olaraq
aparır və gənclərimizin vətənə məhəbbət və hərbi
hazırlıq tərbiyəsində xüsusi səy göstərir, təəssübkeş
vətən oğlu kimi ümumtəhsil məktəblərində hərbi hazırlıq
dərslərinin yüksək səviyyədə tədris edilməsi üçün qüvvə
və bacarığını əsirgəmir.
Gözəl insan, pedaqoq Əhliman müəllim hazırlıqlı bir
metodist kimi Şamaxıda idman ənənələrinin yaşaması,
yeni-yeni qələbələrin əldə edilməsi naminə daima
məqsədyönlü tədbirlər həyata keçirmişdir. Belə ki, o,
məktəblərdə sadə idman qurğularının yaradılması, müasir
tipli idman zallarının maddi-texniki bazasının
möhkəmləndirilməsi üçün əməli işlər görmüş,
məktəblilərin rayon və zona spartakiadalarının
mütəşəkkil şəkildə keçirilməsinə nail olmuş, gərgin
əməyi sayəsində hərbi hazırlıq müəllimlərinin vaxtaşırı
toplantılarını və praktik tədbirlərini həyata
keçirmişdir. Həmçinin o, idman müəllimləri və hərbi
hazırlıq fənlərini tədris edən və ehtiyatda olan
hərbçilərin ixtisasartırma kurslarından vaxtında
keçirilməsinə nail olmuş, ixtisası üzrə müəllimlərə
lazımi səviyyədə elmi-metodiki köməkliklər göstərmişdir.
Əhliman müəllimin əməyi həmişə yüksək qiymətləndirilib.
O, bir çox mükafatlara - diplomlara, fəxri fərmanlara,
fəxri adlara layiq görülmüşdür.
Əhliman müəllimi yeni bir fəxri ada - Azərbaycan
Respublikasının fəxri bədən tərbiyəsi və idman işçisi
adına layiq görülməsi münasibəti ilə Şamaxı idmançıları
çoxsaylı pedaqoji ictimaiyyəti adından ürəkdən təbrik
edir, ona uzun ömür, möhkəm cansağlığı, ailə xoşbəxtliyi
arzusu ilə Şamaxı idmanının tərəqqisi naminə gənc nəslə
həmişə yardımçı olmasını istərdik.
Ədalət MƏMMƏDOV,
Şamaxı RTŞ-ın aparıcı məsləhətçisi |
