|
 ...Bulaq
olaydım... Adicə bir dağ bulağı... Xəzəlli dərələrdən
süzülə-süzülə, durula-durula öz həzin, kövrək nəğməmi
oxuyaydım. Quşların nəğməsinə sirdaş, təbiətin
fəsillərinə yoldaş olaydım. İnsanlara gərək olaydım.
Torpağın sinəsində öz izim qalaydı. Bulaq olaydım...
Bu lirik, həzin, poetik bir dildə yazılmış, böyük məna
kəsb edən yazını Şamxəlil Məmmədov 1967-ci ildə qələmə
almışdı. Elə haqqında söhbət açmaq istədiyimiz, elmi
redaktoru pedaqogika üzrə elmlər doktoru, professor,
əməkdar elm xadimi Fərrux Rüstəmov, tərtibçiləri Bəhruz
Cabbarlı, Aynur Cabbarlı və Aytən Məmmədova, ön sözün
müəllifi, yazıçı, "Təhsil" jurnalının baş redaktoru
Nizami Mirzə olan bu kitabın "Bulaq olaydım..." adı da
Şamxəlil müəllimin əvvəldə bir parça verdiyim yazısı
əsasında meydana gəlib.
"Elm və təhsil" nəşriyyatı tərəfindən nəfis şəkildə
tərtib edilərək oxuculara çatdırılan 160 səhifəlik bu
kitabda tanınmış jurnalist, alim, "Azərbaycan müəllimi"
qəzetinin şöbə redaktoru, Sumqayıt Dövlət
Universitetinin "Folklorşünaslıq" elmi tədqiqat
laboratoriyasının müdiri, "El sözü" jurnalının təsisçisi
və baş redaktoru, akademik M.Mehdizadə, "Qızıl qələm" və
"Araz" ali ədəbi mükafatı laureatı, pedaqogika üzrə
fəlsəfə doktoru, respublikanın əməkdar jurnalisti,
"Tərəqqi" medallı Şamxəlil Hətəm oğlu Məmmədovun həyatı,
elmi-pedaqoji və jurnalistik fəaliyyətindən bəhs olunur,
onun haqqında həmkarlarının, iş yoldaşlarının,
dostlarının, əzizlərinin ürək sözləri və acılı-şirinli
xatirələri verilib.
Kitabda toplanmış hər bir ürək sözlərini oxuyanda
Şamxəlil müəllimin bir jurnalist, bir müəllim, bir alim
kimi nurlu siması göz önündə canlanır. Qızları Aytən
Məmmədovanın "Sən həmişə yaşayacaqsan...", Aynur
Cabbarlının "Ay Ata...", Aynurun həyat yoldaşı Bəhruz
Cabbarlının "Ümidim, pənahım Təbriz..." adlı yazıları
isə qəlbi sızladaraq insanı kövrəldir.
Onu da deyim ki, bu il yanvarın 23-də Şamxəlil müəllimin
il mərasiminə yığışdığımız zaman bizlərə verilmiş "Bulaq
olaydım..." kitabı bu gün hamımızın stolüstü kitabıdır.
Bu qiymətli kitabı araya-ərsəyə gətirənlərə iş
yoldaşları, dostları adından təşəkkür edirəm.
Şamxəlil müəllim "Bulaq olaydım..." - deyirdi. Amma o,
elə bir saf, şəffaf, şirin sulu bulaq idi ki, yazıları
ilə oxucularının, alimliyi ilə elm adamlarının,
mühazirələri ilə tələbələrinin, şagirdlərinin, şirin
söhbətləri ilə dostlarının, qayğıkeşliyi ilə ailəsinin,
övladlarının qəlbinə süzülərək dolub, özü demişkən,
insanlara həmişə gərək olub. Elə buna görə də o,
dünyasını dəyişsə də, qəlbimizdə əbədi yaşayır.
Ədalət DAŞDƏMİRLİ |
