|
 Naxçıvan
Dövlət Universitetində 2 fevral - Gənclər günü
münasibəti ilə "Gənclik və müasirlik" mövzusunda elmi
konfrans keçirilmişdir.
NDU-nun tərbiyə işləri üzrə prorektoru, fəlsəfə elmləri
doktoru, professor, əməkdar müəllim Məmməd Rzayev
konfransı açaraq ümummilli lider Heydər Əliyevin gənclər
siyasətindən, müstəqil Azərbaycanın inkişafında aparıcı
qüvvə kimi gəncliyə daimi diqqət və qayğı göstərməsindən
söz açdı. Qeyd olundu ki, Gənclər günü 1996-cı ildə ulu
öndərimiz Heydər Əliyevin sərəncamı ilə qeyd olunmağa
başlamışdır. Natiq Azərbaycan gəncliyinin yüksək
intellektual potensiala, milli mənəviyyata və müasir
dünyagörüşünə malik olduğunu vurğuladı. Prezident İlham
Əliyevin və Naxçıvan MR Ali Məclisinin sədri Vasif
Talıbovun hərtərəfli qayğısı və yüksək etimadı sayəsində
gənclərimizin sosial-siyasi, iqtisadi və digər sahələrdə
böyük uğurlar qazanmasından bəhs olundu.
Sonra Universitet Gənclər Təşkilatının sədri, magistr
Arzu Abdullayev "Azərbaycan gəncliyi inkişaf
mərhələsində", YAP Tələbə Gənclər Birliyinin sədri,
beynəlxalq münasibətlər və xarici dillər fakültəsinin
ikinci kurs tələbəsi Aytən İsmayılova "Gənclik Yeni
Azərbaycan Partiyası sıralarında", Tələbə Elmi
Cəmiyyətinin sədri, sosial idarəetmə və hüquq
fakültəsinin ikinci kurs tələbəsi Ramazan Abdullayev
"Universitet gəncliyi və elmi mühit", Tələbə Həmkarlar
Təşkilatının sədri, sosial idarəetmə və hüquq
fakültəsinin ikinci kurs tələbəsi Mətin Quluzadə
"Gənclərə dövlət qayğısı və Tələbə Həmkarlar
Təşkilatının vəzifələri", Tələbə İdman Şurasının sədri,
pedaqoji fakültənin birinci kurs tələbəsi Nicat
Abdullayev "Universitet idmanı inkişaf yolunda"
mövzularında məruzələr etdilər. Məruzələrdə gənclərin
ölkədəki ictimai-siyasi proseslərdə fəal vətəndaşlıq
mövqeyi tutmalarından, sosial-iqtisadi islahatların
aparılmasında müstəsna rol oynamalarından, Azərbaycanı
dünya miqyasında layiqincə təmsil etmələrindən söz
açıldı. Bildirildi ki, universitetdə oxuyan tələbə
gənclər də dövlət siyasətini yekdilliklə dəstəkləyir,
beynəlxalq və ümumrespublika səviyyəli simpozium və
konfranslarda, olimpiadalarda, idman yarışlarında
iştirak edərək xalqının və təhsil aldıqları ali məktəbin
adını şərəf və ləyaqətlə doğruldurlar. Tələbə gənclər
müstəqil Azərbaycanın tərəqqisi üçün bundan sonra da
əzmlə fəaliyyət göstərəcək.
Universitetdə təhsil alan banqladeşli tələbə Zaman
Kehruz azərbaycanlı həmkarlarını əlamətdar bayram
münasibətilə təbrik etdi.
Mina QASIMOVA,
NDU-nun Mətbuat şöbəsinin əməkdaşı |
