|
 Astara
Pedaqoji Kollecində Respublikamızın 35-dən artıq şəhər
və rayonundan olan oğlan və qızlar təhsil alır.
Tələbələrin təhsilinin və məişət şəraitinin
yaxşılaşdırılması daim diqqət mərkəzindədir. Tələbələrin
təlim və tərbiyəsi ilə 3 fəlsəfə doktoru, 3 dissertant,
100-ə yaxın yüksək ixtisaslı müəllim, pedaqoq-metodist
və psixoloq məşğul olur.
Tələbələr 100 nəfərlik yataqxanadan, 200 nəfərlik akt
zalından, 150 nəfərlik bufet və yeməkxanadan istifadə
edirlər. Təcrübəli və gənc müəllimlərin müstəqil
işləmələri, elmi və ədəbi yaradıcılıqla məşğul olmaları,
rayon və respublika mətbuatında, xüsusi ilə pedaqoji
mətbuatda müxtəlif mövzulu yazılarla çıxış etməsi üçün
burada lazımi şərait yaradılmışdır. Kollecin müəllim və
tələbələri rayon və respublika miqyaslı tədbirlərdə fəal
iştirak edirlər. Kollecdə 14 ixtisas üzrə kadrlar
hazırlanır.
Azərbaycan Respublikasının təhsil naziri Misir
Mərdanovun "Ali və orta ixtisas təhsili müəssisələrində
2012-2013-cü tədris ilinin qış imtahan sessiyasının
təşkili və keçirilməsi haqqında" 18 dekabr 2012-ci il
tarixli əmrini əsas tutaraq Astara Pedaqoji Kollecinin
direktoru Əlihəsən Həmzəyevin əmri ilə 2012/2013-cü
tədris ilinin qış imtahan sessiyasında əyani və qiyabi
şöbələr üzrə tələbələrin biliyinin qiymətləndirilməsində
şəffaflığı və obyektivliyi təmin etmək, yarana biləcək
neqativ halları aradan qaldırmaq və digər müvafiq
tədbirləri həyata keçirmək məqsədi ilə 13 nəfərdən
ibarət "İmtahan qərargahı" yaradılmışdır. "İmtahan
qərargahı"nın üzvlərinə tapşırılmışdır ki, imtahan
sessiyasının mövcud normativ sənədlər əsasında təşkil
olunmasını təmin etsinlər, sessiya zamanı obyektivliyin
qorunmasına, yarana biləcək münaqişə və şikayətlərin
operativ həll olunmasına nail olsunlar və vətəndaşların
müraciətlərinə operativ baxılması və həmin müraciətlərin
araşdırılması istiqamətində tədbirlər həyata
keçirsinlər. Bununla yanaşı, kollecin direktorunun əmri
ilə "Münaqişə komissiyası" da yaradılmışdır. Artıq qış
imtahan sessiyası başa çatmışdır. Sessiya müddətində heç
bir neqativ hadisə baş verməmiş və tələbələr layiq
olduqları qiymətləri almışlar.
Məlum olduğu kimi, Azərbaycan Respublikası Prezidentinin
sərəncamı ilə 2013-cü il Azərbaycan Respublikasında
"İnformasiya-kommunikasiya texnologiyaları ili" elan
edilmişdir.
Yeni texnologiyaların kollecdə tətbiqi ilə əlaqədar
görülən tədbirlər haqqında Astara Pedaqoji Kollecinin
direktoru, fəlsəfə doktoru, dosent, respublikanın
əməkdar müəllimi Əlihəsən Həmzəyev məlumat verərək
bildirmişdir ki, müasir pedaqoji təhsilin məqsədi
informasiya cəmiyyətinin tələblərinə uyğun olaraq yeni
formatlı müəllim kadrları hazırlamaqdır. Bu gün Avropa
və dünya təhsil sisteminə inteqrasiya, təhsil sisteminin
informasiyalaşdırılması sahəsində Dövlət Proqramı icra
edilir. "Azərbaycan Respublikasında fasiləsiz pedaqoji
təhsil, müəllim hazırlığının konsepsiya və strategiyası"
təsdiq edilmiş, 2008-2015-ci illər üçün bu strategiyanın
icrası ilə əlaqədar müvafiq tədbirlər planı
hazırlanmışdır. Təhsil sisteminin
informasiyalaşdırılması üzrə Dövlət Proqramında pedaqoji
təhsilin informasiyalaşdırılması istiqamətində aşağıdakı
tədbirlərin həyata keçirilməsi nəzərdə tutulmuşdur:
1. Müəllim hazırlığında İKT-nin, yeni təlim üsulları və
texnologiyaların təbliği.
2. Pedaqoji ixtisaslar üzrə təhsil alan tələbələrin
biliyinin cari və yekun qiymətləndirilməsi zamanı yeni
üsulların, texnologiyaların, İKT vasitələrinin tətbiqi.
3. Pedaqoji təhsil müəssisələrində distant təhsil
formasının tətbiqi.
4. Pedaqoji təhsil müəssisələrinin kompüterləşdirilməsi,
elektron təhsilin həyata keçirilməsi.
Astara Pedaqoji Kollecində bu istiqamətlərdə müəyyən
işlər görülür. Kollecdə Kompüter Mərkəzi yaradılmışdır.
Məqsəd pedaqoji təhsilin informasiya - təhsil məkanının
formalaşması, bu əsasda pedaqoji təhsilin
keyfiyyətlərinin təmin edilməsidir. Kompüter mərkəzinin
illik iş planı və onun icrası üçün layihələr sistemi
müəyyənləşdirilmişdir. Tələbələrin biliklərinin
qiymətləndirilməsində "Elektron test sistemi" layihəsi
hazırlanıb müvəffəqiyyətlə sınaqdan çıxarılıb və bu gün
kollecdə uğurla tətbiq edilir.
Builki qış imtahan sessiyasında bir neçə ixtisas üzrə
imtahanlar kompüterlə aparıldı. Kompüter mərkəzində
İnternetə çıxışlar da var idi.
Bütün bunlar bir daha sübut edir ki, müasir təhsil
sistemində tətbiq olunan yeniliklər səviyyəli kadr
hazırlığında mühüm rol oynayır. Bu baxımdan Astara
Pedaqoji Kollecində yeni texnologiyaların tətbiqi
faydalı nəticələr verir.
Azad ABDULLAYEV |
