|
 Ötən
ilin sonlarında vədələşdiyimiz kimi, Bakıdakı 104
nömrəli tam orta məktəbin direktor müavini Kamran
Hüseynovla onun iş otağında görüşdük. Burada ucaboylu
bir oğlan da var idi. Kamran müəllim həmin oğlanı bizə
göstərərək dedi:
-Tanış olun, sizə haqqında söylədiyim, məktəbimizin
fəxri, karate üzrə dünya ikincisi olan Xanlar Vəlizadə
bax, bu şagirdimizdir.
Onunla tanış olduq. Öyrəndik ki, Xanlar 1995-ci ildə
Bakıda anadan olub. 2002-ci ildə paytaxtdakı 141 nömrəli
tam orta məktəbin birinci sinfinə qəbul olub. İkinci
sinifdən sonra təhsilini Bakıdakı 104 nömrəli tam orta
məktəbdə davam etdirib. Hazırda həmin məktəbin XI
sinfində oxuyur. Xanlar 2003-cü ildən "Kentavr" İdman
Klubunda karatenin kiokshkay (mütləq həqiqət axtaranlar
cəmiyyəti) idman növü ilə məşğul olur. Onun
məşqçi-müəllimi 3-cü dan-qara kəmər ustası İlqar
Hüseynovdur.
X.Vəlizadə bir il gərgin məşqlərdən sonra 2004-cü ildə
Bakının Sabunçu rayonunda gənclər arasında keçirilən
respublika çempionatında uğurla iştirak edərək II yerə
çıxıb. 2007 və 2011-ci illərdə Hövsanda keçirilən
respublika çempionatlarında da II yerin qalibi olub.
2010-cu ildə isə Bakıda keçirilən respublika
çempionatında I yeri tutaraq Bakı çempionu olub. 2011-ci
ildə Göyçay rayonunda gənclər arasında keçirilən
respublika çempionatında I yerin qalibi olub.
Xanların ən gərgin beynəlxalq yarışlarından biri 2012-ci
ilin oktyabrında İranın Kiş adasında keçirilən dünya
çempionatı olub. 32 ölkənin iştirak etdiyi, 16-17 yaşlı,
65 kiloqram çəki dərəcəsində olan idmançılarla mübarizə
aparan Xanların rəqibi beşqat dünya çempionu olub. Boyda
və çəkidə də Xanlardan artıq olan, idman qanunlarına
tamamilə zidd olaraq meydançaya buraxılan bu iranlı
idmançıya cəmisi bir xal fərqi ilə "uduzub". Dünya
ikincisi adını qazanaraq gümüş medalın sahibi olub.
Bütün bu haqsızlıqlara baxmayaraq, Xanlar qətiyyən
ruhdan düşməyib. Hazırda o, məşqlərini inadla davam
etdirir. Onun ən böyük arzusu 2013-cü ilin aprelində
Türkiyənin Antalya şəhərində keçiriləcək Avropa
çempionatında iştirak edib Avropa çempionu olmaqdır.
Rəşad ZİYADOV |
