|
 Respublikamızın
böyük sürətlə inkişaf etdiyi son dövrlərdə bütün
sahələrdə, xüsusən də dövlətimizin əsas strateji
sahələrindən biri olan təhsil sahəsində də dinamik
inkişaf gedir və yeniliklər özünü göstərir. 2006-cı ildə
təsdiq olunmuş Milli Kurikulum sənədi təhsilimizin
əsaslı şəkildə dəyişdirilməsinə yönəldilmiş və xeyli
uğurlar əldə olunmuşdur.
Artıq ölkəmizdə beş ildir ki, Milli Kurikulum sənədinə
əsasən fənn kurikulumları tətbiq edilir və bunun
əsasında dövrümüzün tələblərinə, şagirdlərin yaş
xüsusiyyətlərinə uyğun olan yeni-yeni dərsliklər
hazırlanır.
Bu gün müzakirə obyektinə çevrilən bu yeni dərsliklər
haqqında müsbət fikirlərlə yanaşı, bəzi nöqsanların da
olduğu bildirilir. Və bu dərsliklərlə əlaqədar fikir
mübadiləsi aparmaq məqsədilə respublikamızda dərslik
müəllifləri ilə təhsil işçilərinin seminarları, müxtəlif
görüşlər keçirilir.
Belə seminarlardan biri də yanvarın 17-də Sumqayıt Şəhər
Təhsil Şöbəsinin konfrans zalında keçirilmişdir.
Təhsil Nazirliyi Dərslik və nəşriyyat şöbəsinin müdiri
Faiq Şahbazlı, ŞTŞ-nin müdiri Mahal Əliyev, metodiki
kabinetin əməkdaşları və şəhərin bütün ümumtəhsil
məktəblərini təmsil edən 123 nəfər fənn müəlliminin
iştirak etdiyi müzakirədə çıxış edənlər əsasən
mətbuatda, İnternet səhifələrində öz fikirlərini qərəzli
şəkildə müzakirə obyektinə çevirməyə, dərsliklər, onu
qiymətləndirən ekspertlər, məsul şəxslər və təşkilatlar
haqqında mənfi rəy formalaşdırmağa çalışan "müəlliflərə"
öz iradlarını bildirmiş, bunun ölkənin təhsil
islahatında aparılan məqsədyönlü işlərə qara yaxmaq,
özlərinin itirilmiş "şöhrət"lərini geri qaytarmaq
məqsədilə bir mənbədən qaynaqlandığını vurğulamış və
pisləmişlər. Müəllimlərdən Aidə Ələkbərova, Aynurə
Yusifova, Fazil Ellazov, Tahirə Muradova, Söhrab Əliyev,
Sahibə Quliyeva, Ərəstun Abdulsalamov və başqaları
dərsliklərin fənn kurikulumlarının tələbinə uyğun -
rəngarəng tərtibatda olmasını, tapşırıqların düşündürücü
olmaqla bərabər, həyatla əlaqəli şəkildə verilməsini,
şagirddə müqayisə etmək, nəticə çıxarmaq bacarıqları
aşıladığını, materialların təfəkkürə, yaddaşa
əsaslandığını müsbət hal kimi qiymətləndirmiş, tarixi
dərsliklərin uğurlu olmasını qeyd etmişlər. Seminarda
həmçinin sivil cəmiyyət üçün normal hesab edilən,
inkişaf etmiş ölkələrin təhsil sistemində özünü
doğrultmuş variativ dərsliklərin ölkəmizdə də tətbiq
olunmasına ciddi ehtiyacın yaranmasına, bu sahədə ilk
addımların atılmasına da münasibət ifadə edilmiş,
dövlətin müəllim və şagird qarşısında qoyduğu
standartları əsas amil, bu standartların reallaşmasında
isə dərsliklərin alternativ olaraq yazılmasını
məqsədəuyğun hesab edilməsi bildirilmişdir.
 Müzakirədə
qeyd edilmişdir ki, stabil dərsliklər təcrübədən
keçdikdən, sağlam irad və təklifləri qəbul etməklə
təkmilləşdirildikdən sonra həyata vəsiqə qazanır,
uzunömürlü olur.
Şübhəsiz, ölkəmizin təhsil quruculuğunda ilk dəfə tətbiq
olunan dərsliklərin də təkmilləşdirilməsinə ehtiyac
vardır. Bu məqsədlə müzakirədə bir sıra təkliflər də
müəlliflərin nəzərinə çatdırılmışdır.
Dərslik müəllifləri Afət Süleymanova, Rafiq İsmayılov,
Nayma Qəhrəmanova, Gülər Mehdiyeva, Hafiq Cabbarov
söylənilən irad və təkliflərə öz səmimi münasibətlərini
bildirmişlər.
Təhsil Nazirliyinin şöbə müdiri Faiq Şahbazlı
iştirakçıların suallarına aydınlıq gətirmişdir.
Ümumiyyətlə, dərslik müəllifləri ilə Sumqayıt
müəllimlərinin görüşü səmərəli və faydalı olmuş və
maraqlı keçmişdir.
Sumqayıt Şəhər Təhsil Şöbəsinin Mətbuat xidməti
|
