|
 Yanvarın
18-də Azərbaycanda səfərdə olan Türkiyə Ali Təhsil
Şurasının (Yüksək Öyrətim Kurulu) sədri Gökhan
Çetinsayanın rəhbərlik etdiyi nümayəndə heyəti ilə
Təhsil Nazirliyində görüş keçirildi.
Təhsil Nazirliyi rəhbərliyinin və nazirliyin bəzi
şöbələrinin müdirlərinin, ali məktəblərin rektorlarının
iştirak etdiyi görüşü təhsil naziri Misir Mərdanov
açaraq qonaqları səmimi salamladı, onları nazirlikdə
görməsindən böyük məmnunluq duyduğunu bildirdi. Türkiyə
Ali Təhsil Şurasının (Yüksək Öyrətim Kurulu) sədri
G.Çetinsayanın rəhbərliyi altında geniş tərkibdə
nümayəndə heyətinin ölkəmizə gəlişini yüksək
qiymətləndirən təhsil naziri hörmətli qonaqların səfər
müddətində bir sıra ali təhsil ocaqlarında görüşlər
keçirdiyini diqqətə çatdırdı.
Azərbaycanla Türkiyə arasındakı münasibətlərdən bəhs
edən nazir iki ölkənin təhsil sahəsində qarşılıqlı
dostluğa, qardaşlığa əsaslanan çoxtərəfli və inkişaf
etmiş əlaqələrin mövcud olduğunu, son 20 il ərzində bu
sahədə ciddi uğurlar qazanıldığını qeyd etdi. Hazırda
qardaş Türkiyənin ali məktəblərində 4 mindən çox
azərbaycanlı gəncin təhsil aldığını deyən təhsil naziri
onların hər cür qayğı ilə əhatə olunduğunu vurğuladı.
Sonra Misir Mərdanov qonaqlara Azərbaycanın təhsil
sistemi haqqında ətraflı məlumat verdi. Ölkəmizin dünya
təhsilinə inteqrasiya sahəsində uğurlu addımlar atdığını
söyləyən nazir təhsilin ayrı-ayrı pillələri üzrə mövcud
vəziyyəti, təhsilin inkişafı istiqamətində görülmüş
işlərin nəticələrini, xüsusən də son 10 il ərzində
Azərbaycan dövlətinin təhsilə ayırdığı vəsaitin, təhsilə
qoyulan investisiyanın inkişaf dinamikasını, təhsil
sahəsində xarici əlaqələri, ölkəmizdə həyata keçirilən
"2007-2015-ci illərdə Azərbaycan gənclərinin xarici
ölkələrdə təhsili üzrə Dövlət Proqramı" çərçivəsində
xaricdə təhsil almaq hüququ qazananların sayını əks
etdirən statistik rəqəmləri diqqətə çatdırdı.
Çıxışında Azərbaycan-Türkiyə təhsil əlaqələrindən də
ətraflı bəhs edən nazir ötən 20 il ərzində iki qardaş
ölkə arasında təhsil sahəsində çoxtərəfli əməkdaşlığı
həyata keçirmək üçün lazımi hüquqi baza yaradıldığını,
"Böyük Tələbə layihəsi" çərçivəsində indiyədək 4317
azərbaycanlı gəncin Türkiyənin ali məktəblərində təhsil
almaq üçün göndərildiyini, hazırda həmin layihə üzrə
473 nəfərin oxuduğunu, Azərbaycan ali məktəblərində isə
63 Türkiyə vətəndaşının təqaüdlü təhsil aldığını
bildirdi. Bu günədək Dövlət Proqramı çərçivəsində
Türkiyədə 366 nəfər azərbaycanlı gəncin təhsil almaq
hüququ qazandığını, hazırda isə sözügedən proqram üzrə
306 nəfərin Türkiyə universitetlərində müxtəlif
ixtisaslar üzrə təhsil almaqda olduğunu deyən təhsil
naziri həmin tələbələrin oxuduqları universitetlərin
adlarını da görüş iştirakçılarının nəzərinə çatdırdı.
Ölkələrimiz arasında tələbə mübadiləsinin
genişləndirilməsi üçün hərtərəfli imkanların olduğunu
vurğulayan nazir bütövlükdə qardaş ölkə ilə təhsil
sahəsində əməkdaşlığın daha da inkişaf etdirilməsinin,
birgə elmi tədqiqat layihələrinin həyata keçirilməsinin,
simpoziumların təşkilinin, birgə dərgilərin nəşrinin,
ortaq texnoparklar yaradılmasının zəruri olduğunu
söylədi. Nazir habelə iki ölkənin ali məktəbləri
arasında əlaqələrin inkişafında 8 ölkədən 42 üzvü olan
Qafqaz Universitetlər Birliyinin rolunu yüksək
dəyərləndirdi, qurumun növbəti toplantısının Bakıda
keçiriləcəyini diqqətə çatdırdı.
Səmimi qəbul üçün təhsil naziri Misir Mərdanova təşəkkür
edən Türkiyə Ali Təhsil Şurasının sədri Gökhan Çetinsaya
Azərbaycanda olmaqdan sevinc hissi duyduğunu qeyd etdi.
Ali Təhsil Şurasının sədri Türkiyə-Azərbaycan əlaqələri,
təhsil sahəsi üzrə əməkdaşlığın inkişaf etdirilməsi,
birgə tələbə mübadiləsinin aparılması haqqında
fikirlərini bildirdi, iki ölkənin ali məktəbləri
arasında daha sıx əməkdaşlığın yaranmasında Qafqaz
Universitetlər Birliyinin rolunu yüksək qiymətləndirdi.
Belə görüşlərin ikitərəfli əlaqələrin
genişləndirilməsinə öz töhfəsini verəcəyinə əminliyini
ifadə edən G.Çetinsaya bildirdi ki, iki qardaş ölkə
arasında təhsil sahəsində əməkdaşlığın müasir tələblər
səviyyəsində qurulması istiqamətində səylərini
əsirgəməyəcək. Qonaq müasir dövrdə elm və təhsilin
səviyyəsinin yüksəldilməsinə xüsusi önəm verildiyini,
hazırda dünyada 4 milyondan çox insanın xarici ölkələrdə
təhsil aldığını söylədi, ali məktəblərimiz arasındakı
münasibətlərin daha da inkişaf etdirilməsinin
zəruriliyini vurğuladı.
Görüşdə Qafqaz Universitetlər Birliyinin üzvü olan
Azərbaycan ali məktəblərinin rektorlarına müvafiq
diplomlar təqdim edildi.
Sonra çıxış edən Ərdahan Universitetinin rektoru, Qafqaz
Universitetlər Birliyinin rəhbəri Ramazan Qorxmaz,
Naxçıvan Dövlət Universitetinin rektoru İsa Həbibbəyli,
Ərzurum Atatürk Universitetinin rektoru Hikmət Koçak,
Xəzər Universitetinin Direktorlar və Qəyyumlar Şurasının
sədri Hamlet İsaxanlı, Azərbaycan Memarlıq və İnşaat
Universitetinin rektoru Gülçöhrə Məmmədova, Azərbaycan
Dövlət İqtisad Universitetinin rektoru Şəmsəddin Hacıyev
universitetlərarası əlaqələrin gələcək inkişaf
perspektivləri və nəzərdə tutulmuş əməkdaşlıq
sahələrindən söhbət açdılar.
Təhsil naziri Misir Mərdanov ölkələrimiz arasında təhsil
sahəsində mövcud əlaqələrin daha da möhkəmləndirilməsi
və inkişafı, birgə əməkdaşlığın genişləndirilməsi üçün
qarşıda duran vəzifələrə toxundu, həlli vacib olan bir
sıra məsələləri nəzərə çatdırdı. Hər iki ölkə
universitetlərini daha sıx əməkdaşlıq yolunda fəal
olmağa səsləyən nazir bunun üçün mövcud olan zəngin
potensialdan səmərəli istifadə ediləcəyinə əminliyini
bildirdi.
Yusif ƏLİYEV |
