|
 Yanvarın
17-də Bakı Pedaqoji Kadrların İxtisasartırma və
Yenidənhazırlanma İnstitutunda Azərbaycan Respublikası
Təhsil Şurası ilə birgə görkəmli təhsil qurucusu və
təşkilatçısı akademik Mehdi Mehdizadənin 110 illik
yubileyinə həsr olunmuş elmi-praktik konfrans
keçirilmişdir. Konfransdan öncə qonaqlar institutda
2012-ci ildə yaradılmış Heydər Əliyev muzey-lektoriyası
ilə tanış oldular. Konfransı giriş sözü ilə institutun
rektoru, professor Asəf Zamanov açaraq görkəmli alimin
həyatı, fəaliyyəti və elmi yaradıcılığı barədə geniş
məlumat verdi. Bildirildi ki, akademik Mehdi Mehdizadə
görkəmli alim olmaqla yanaşı, əsl ziyalı kimi vətəninə,
millətinə sadiq, haqq yolunda əyilməz və mətin bir
vətəndaş, əqidəsinə, amalına xidmət edən kamil bir insan
idi.
Onun həyatı iyirminci yüzilliyin tam 80 ilini əhatə
edir. Bu illər ərzində o, bir neçə siyasi quruluş,
iqtisadi münasibətlər, müxtəlif baxışlar, ideologiya,
fərqli tələb və vəzifələrlə qarşılaşmışdı.
Asəf müəllim qeyd etdi ki, Azərbaycan Respublikası
Maarif Nazirliyinə rəhbərlik etdiyi 25 ilə yaxın bir
müddətdə Mehdi Mehdizadə xalq maarifinin fəal
təşkilatçısı olmaqla yanaşı, geniş diapazonlu pedaqoq
alim kimi də tükənməz yaradıcılıq axtarışlarını davam
etdirmişdir. Həmin dövrdə yeni məktəblərin açılması,
onların müasir avadanlıqla təchizi, təlim-tərbiyə
prosesinin elmi əsaslarla təşkili, respublikamızda
intellektual potensialın formalaşdırılması sahəsində çox
böyük işlər görmüşdür. Yüksək mədəniyyət sahibi, nitqi,
davranışı, ətrafındakılara münasibəti ilə seçilən Mehdi
müəllim təkcə alim kimi deyil, bir insan kimi də
akademik idi. Bir sıra dəyərli monoqrafiyaların müəllifi
olan akademik M.Mehdizadə nəinki respublikamızda və
keçmiş SSRİ-də, eyni zamanda YUNESKO-nun konfrans,
müşavirə və iclaslarındakı məruzə və çıxışları, habelə
alman, ingilis, fransız, ispan, ərəb və s. dillərdə çap
olunmuş məqalələri ilə beynəlxalq aləmdə də böyük nüfuz
qazanmışdır. Adi kənd müəllimliyindən başlayan pedaqoji
fəaliyyət onu nazir vəzifəsinə, akademik zirvəsinə qədər
yüksəltmişdir. Əminəm ki, keçmiş SSRİ maarif naziri
akademik M.A.Prokofyevin "Akademik M.M.Mehdizadə
pedaqogika elminin korifeylərindən biri, maarif
quruculuğunun görkəmli təşkilatçısı kimi tanınmışdır"
fikri əbəs yerə yaranmamışdır.
Natiq çıxışında onu da vurğuladı ki, akademik
M.Mehdizadənin mənalı ömür yolu, həyatı və
elmi-pedaqoji, ictimai fəaliyyəti həmişə diqqət
mərkəzində olub. Təsadüfi deyil ki, Azərbaycan
Respublikasının təhsil naziri, professor Misir
Mərdanovun layihəsi əsasında hazırlanmış və 2010-cu ildə
nəfis şəkildə çap olunmuş "Azərbaycanın təhsil
nazirləri" kitabının "Azərbaycan xalq maarifi nazirləri"
bölməsində Mehdi Mehdizadənin ömür yolu, elmi-pedaqoji
və ictimai fəaliyyəti haqqında konkret faktlar dərc
olunub.
Ümummilli lider Heydər Əliyevin elmə, təhsilə olan
diqqət və qayğısı akademik Mehdi Mehdizadədən də yan
keçməyib. Ulu öndər hər zaman görkəmli alimin elmi
fəaliyyətini və təşkilatçılıq bacarığını yüksək
qiymətləndirmişdir. Akademik Mehdi Mehdizadənin
pedaqogika elminin, pedaqoq alimlərin inkişafında,
formalaşmasında böyük zəhməti və mühüm rolu olmuşdur. Bu
gün akademik Mehdi Mehdizadənin yetirmələri təkcə
respublikamızda deyil, həmçinin xarici ölkələrdə
vətənimizi layiqincə təmsil edib, elmimizi inkişaf
etdirirlər.
Sonra Mehdi Mehdizadənin ömür yoluna həsr edilmiş
sənədli film nümayiş etdirildi.
Konfransda Azərbaycan Respublikası Təhsil Şurasının
sədri, professor Əjdər Ağayev "Akademik Mehdi
Mehdizadə-görkəmli təhsil təşkilatçısı", Azərbaycan
Respublikası Təhsil Problemləri İnstitutunun şöbə
müdiri, professor Vidadi Xəlilov "Akademik Mehdi
Mehdizadənin pedaqoji irsində müasirlik tendensiyaları"
mövzularında məruzə etdilər. Təhsil Problemləri
İnstitutunun direktoru, professor Abdulla Mehrabov,
həmin institutun direktor müavini, professor Yəhya
Kərimov, "Azərbaycan məktəbi" jurnalının baş redaktoru,
filologiya üzrə fəlsəfə doktoru Nəcəf Nəcəfov, Təhsil
Muzeyinin direktor müavini Arif Muradov və digərləri
Mehdi müəllimlə bağlı maraqlı xatirələr söylədilər.
Tədbirdə İnstitutun professor-müəllim heyəti,
tələbələri, Təhsil Şurası İdarə Heyətinin üzvləri, digər
ali məktəblərin mütəxəssisləri ilə yanaşı, alimin ailə
üzvləri də iştirak edirdilər. Mehdi müəllimin övladları
- pedaqogika üzrə fəlsəfə doktoru Zemfira Mehdizadə və
Nailə Mehdizadə onun təkcə dəyərli alim, görkəmli maarif
qurucusu kimi deyil, həm də bir ata kimi mənəvi
zənginliyə malik olduğundan danışdılar və elmi-praktik
konfransın təşkilinə görə minnətdarlıqlarını
bildirdilər.
Rəşad ZİYADOV |
