|
Bu günlərdə Təhsil Problemləri İnstitutunun
əməkdaşlarının iştirakı ilə məktəbimizdə tədbir
keçirildi. Məktəbin akt zalında keçirilən görüşdə I-V
siniflərdə dərs deyən müəllimlər və həmin siniflərdə
oxuyan şagirdlər, valideynlər və digər qonaqlar iştirak
edirdi.
Görüşün məqsədi məktəbdaxili qiymətləndirmənin necə
aparılmasını anlatmaq, valideynlərlə maarifləndirmə
işləri aparmaq, formativ qiymətləndirmə jurnallarının
düzgün yazılma qaydalarını müəllimlərin nəzərinə
çatdırmaq, kurikulumla tədris zamanı müəllimlərin
qarşılaşdıqları suallara aydınlıq gətirməkdən ibarət
idi.
Tədbirdə çıxış edən Təhsilin Humanistləşdirilməsi
İctimai Birliyinin sədri Elxan Cəfərov bildirdi ki,
ənənəvi qiymətləndirmənin nəticələri rəqəmlərlə ifadə
olunduğundan ziddiyyətli hallar yaranır. Belə ki, eyni
vaxtda hər iki şagird "5" ilə qiymətləndirilərsə,
onlardan biri həqiqi "5", digəri isə fərqləndirici "5"
qiymət ala bilər. Bu zaman qiymətləndirmədə ədalətlilik
prinsipi pozulur. Formativ qiymətləndirmə baxımından
həqiqi "5" qiymət alan şagird təqdir edilməli və
dəstəklənməli, rəğbətləndirici "5" qiyməti alan şagirdə
isə dönüş yaratması üçün vasitələr axtarmalı, ona
tövsiyələr verilməlidir. Gündəlikdə qeyd olunan bu
fikirlər müəllimlə valideyn arasında mühüm bir əlaqədir.
Ona görə ki, valideyn bu fikirlə tanış olur, övladının
mövzunun hansı hissəsini tam və müəyyən hissəsini
nisbətən zəif mənimsəməsini konkret bilir.
Görüşdə çıxış edən valideyn Cəmilə Qocalı bu təlim
üsulunun ənənəvi təlim üsulundan üstün cəhətlərini qeyd
edərkən bildirdi ki, indi şagird daha fəal və özünə
inamlı olur. Qruplarla iş zamanı yoldaşlarını dinləyir,
razılaşır, kollektivçilik ruhunda tərbiyə olunur. Bu isə
gələcəkdə şagirdlərin bir-biri ilə daha çox ünsiyyətdə
olmalarına gətirib çıxarır.
Çıxışlar zamanı ibtidai sinif müəllimləri formativ
qiymətləndirmə jurnallarında mövzularla bağlı
standartların seçilməsində bəzi çətinliklərlə
qarşılaşdıqlarını, bununla əlaqədar onlara köməklik
göstərilməsini xahiş etdilər. Bu haqda təlimçi Məlahət
Əliyeva bildirdi ki, mövzu yazılarkən qarşıya
standartlar (məqsədlər) qoyulur. Bu zaman bir
üst-standart və onun alt-standartlarından istifadə
olunur, qiymətləndirmə də bu standartlar əsasında
aparılır. Əgər şagird seçilmiş standartlardan hamısını
mənimsəyirsə, ən yüksək səviyyədə qiymətləndirilir.
Standartlardan birini zəif qavrayan şagird orta səviyyə
ilə və s. qiymətləndirilir.
Formativ qiymətləndirmə jurnallarında yazılan
qiymətlərlə gündəlikdə yazılan qiymətlər üst-üstə
düşməlidir. Bu da valideynlə müəllim arasında bir
körpüdür.
Həmin gün məktəbimizin müəllim və valideynləri
qarşılıqlı anlaşma şəraitində keçən bu görüşdən yüksək
səviyyədə faydalandıqlarına görə dəvət olunmuş
mütəxəssislərə öz təşəkkürlərini bildirdilər.
Mətanət MEHBALIYEVA,
Bakıdakı 249 nömrəli tam orta məktəbin ibtidai sinif
müəllimi |
