Bu günlərdə Lerik rayonunun ucqar dağ kəndi olan Barzavuda yeni məktəb binasının açılış mərasimi keçirilib. Tədbirdə  məktəbin müəllim-şagird kollektivi ilə yanaşı Lerik Rayon İcra Hakimiyyətinin başçısı Rövşən Bagırov, rayon təhsil şöbəsinin müdiri Balaşirin Nəsirov, ziyalılar, kənd sakinləri, valideynlər və digər şəxslər iştirak ediblər.

Tədbirdə çıxış edən rayon təhsil şöbəsinin müdiri Balaşirin Nəsirov ikimərtəbəli 180 yerlik məktəbdə fənn kabinetləri, kompüter otagı, laboratoriya, kitabxana, idman və akt zalı olduğunu bildirib. Yeni tikilən məktəbin müasir avadanlıqlarla təchiz olunduğunu qeyd edən B.Nəsirov təhsil ocağında müasir istilik sisteminin  quraşdırıldığını da nəzərə çatdırıb.

Açılış mərasimində Lerik Rayon İcra Hakimiyyətinin başçısı Rövşən Bağırov çıxış edərək əsası ümummilli lider Heydər Əliyev tərəfindən qoyulmuş təhsil strategiyasının Azərbaycan Prezidenti cənab İlham Əliyev tərəfindən uğurla həyata keçirildiyini, dövlətimizin qayğısı sayəsində rayonda təhsilin maddi-texniki bazasının sürətlə yeniləşdiyini, təhsildə keyfiyyət dəyişikliklərinin baş verdiyini diqqətə çatdırıb.

Məktəbin rəsmi açılışını bildirən qırmızı lent kəsildikdən sonra iştirakçılar təhsil ocağında yaradılmış şəraitlə yaxından tanış olublar. 

Niyazi RƏHİMOV