Artıq beşinci ildir ki, ölkəmizdə yeni fənn kurikulumları tətbiq edilməkdədir. Təhsildə aparılan bütün islahatlar kimi, kurikulum islahatında da aparıcı sima müəllimlərdir. Bu mənada yeni fənn kurikulumlarının uğurlu tətbiqi, ilk növbədə, müəllimlərin bu prosesə necə hazırlaşmalarından, yeniliyin mahiyyətini necə dərk etmələrindən, fəal təlimin forma və üsullarına nə dərəcədə yiyələnmələrindən asılıdır. Bu məqsədlə yeni kurikulumlarla işləyən bütün müəllimlər təlim kurslarından keçirilsə də son illərin təcrübəsi göstərir ki, bu azdır. Müəllimlər özləri də şəxsi təhsil yolu ilə, yenilikləri, həmkarlarının qabaqcıl təcrübəsini öyrənməklə öz üzərlərində müntəzəm çalışmalıdırlar. Yaxşı haldır ki, hazırda yeni kurikulumlarla tədris aparan müəllimlərin çoxu məhz belə edir və bunun da nəticəsində fəaliyyətlərini gündən-günə təkmilləşdirir, uğurlarını artırırlar.

Belə müəllimlərdən biri də Saatlı rayonundakı Əlisultanlı kənd orta məktəbinin ibtidai sinif müəllimi Nazilə İbrahimovadır. Uzun illər bu təhsil ocağında çalışan, elm-bilik yollarında ilk addımlarını atan uşaqlara biliklərin əsaslarını öyrədən, öyrəndiklərini bacarıq və vərdişlərə çevirən Nazilə müəllim pedaqoqlarımızın nisbətən yaşlı nəslinə mənsubdur. Lakin o, təbiəti etibarı ilə yeniliyə, yaradıcı axtarışlara meyilli olduğundan təhsilimizdə gedən yeniləşmə proseslərinin də önündə getməyə, onları həvəslə öyrənib öz fəaliyyətində tətbiq etməyə səy göstərir.

Bütün ibtidai sinif müəllimləri kimi Nazilə müəllim də kurikulumların tətbiqi üzrə təlim kursundan keçmiş, müvafiq sertifikat almışdır. Kursda olarkən digər həmkarları kimi o da kurikulumların strukturu, məzmunu, prinsipləri, müasir kurikulumlar və yeni təlim strategiyaları, yeni qiymətləndirmə mexanizmləri, yeni dərsliklərlə və əlavə resurslarla işin xüsusiyyətləri, dərsin planlaşdırılması və təşkili, qiymətləndirmə vasitələrinin, şagirdlərin müstəqil işləri üzrə təlim tapşırıqlarının hazırlanması üzrə kifayət qədər geniş nəzəri məlumatlar almış, praktik bacarıqlara yiyələnmişdir. Lakin o, təkcə aldığı həmin bilik və bacarıqlarla kifayətlənmir, kurikulumlarla iş üzrə bütün yenilikləri diqqətlə izləməklə öz nəzəri və praktik hazırlığını daim artırır. Məhz bunun nəticəsidir ki, Nazilə İbrahimova hazırda dərs dediyi III sinifdə tədrisi kurikulumun tələblərinə uyğun qurub aparmağa nail olur.

Təcrübəli müəllim dərslərdə inteqrasiyaya, fəal metodlarla işə xüsusilə önəm verir, bütün mövzuları tədris edərkən onların həm şaquli, həm də üfiqi inteqrasiya imkanını üzə çıxarır və dərsdə tətbiq edir, fəal, interaktiv təlim metodlarını, iş formalarını necə gəldi deyil, mövzunun xüsusiyyətlərinə, dərsin qarşısında qoyulan məqsədə uyğun müəyyənləşdirir.

Şagirdlərin öyrənilən mövzuya, bütövlükdə dərsə marağını artırmaq üçün dərsin mərhələlərini yaradıcı qurur, motivasiya yaratmaq üçün maraqlı formalardan istifadə edir. Müstəqil öyrənmənin təlimdə böyük üstünlükləri olduğunu yaxşı bilən Nazilə müəllim demək olar ki, hər dərsdə şagirdlərlə müstəqil iş aparır, bunun üçün əvvəlcədən mövzunun məzmununa uyğun tətbiqi tapşırıqlar müəyyənləşdirir.

Təcrübəli müəllim tədris prosesində İKT-dən istifadəyə də geniş yer verir, şagirdlərlə birlikdə kiçik təqdimatlar hazırlayır və onları elektron lövhədə nümayiş etdirir.

Kurikulumlar üzrə tədrisdə valideynlərin rolunu düzgün qiymətləndirən N.İbrahimova onlarla sıx əlaqə saxlayır, kurikulumların mahiyyətini yaxşı başa düşmələri üçün onlarla maarifləndirici söhbətlər aparır. Bütün bunların nəticəsidir ki, onun dərs dediyi III sinfin şagirdləri dərslərdə böyük fəallıq göstərir, öyrənilən mövzuları yaxşı mənimsəyirlər.

N.İbrahimova öz təcrübəsini həmkarları ilə bölüşmək üçün tez-tez "açıq dərs"lər verir, müəllim yoldaşlarının apardıqları dərslərdə iştirak edir. 

Yusif ƏLİYEV