Azərbaycan Respublikası müstəqillik qazandıqdan sonra əldə etdiyimiz ən böyük uğurlardan biri və xaricdə yaşayan soydaşlarımızın və həmvətənlərimizin ölkəmizlə əlaqələrinin daha da möhkəmlənməsi, dünya azərbaycanlıları arasında birliyə və həmrəyliyə nail olmağımızdır. Xalqımızın birlik və mütəşəkkilliyinin, milli təəssübkeşlik və Vətənə sədaqətinin rəmzi olan 31 dekabr - Dünya Azərbaycanlılarının Həmrəylik Günü soydaşlarımız tərəfindən əlamətdar bir tarix kimi qeyd edilir.

Planetin müxtəlif şəhərlərinə səpələnmiş azərbaycanlıların milli vəhdət günü - həmrəylik günü münasibətilə təhsil müəssisələrində keçirilən rəngarəng tədbirlərdən biri də dekabrın 27-də Bakı şəhər Bağça-Məktəb-Lisey Kompleksinin X "ç" sinfində oldu.

Təhsil müəssisəsinin direktoru Qafar Hüseynov, fənn müəllimləri və valideynlərin iştirak etdiyi "Gücümüz həmrəylikdədir"  adlı tədbir musiqisi Tahir Əkbərə, sözləri Hilal Həsənoğluna aid "Həmrəylik himni"nin oxunması ilə başladı.

X "ç" sinfinin rəhbəri, direktorun təlim-tərbiyə işləri üzrə müavini Natəvan Heydərova bu günün yaranması zərurəti və qeyd olunması ilə bağlı məlumat verərək bildirdi ki, bu əziz bayram dünyadakı bütün soydaşlarımızın qəlbini Vətən hərarəti ilə isidir və müstəqil Azərbaycan dövlətinə məhəbbət hissi aşılayır. Bu gün dünyada 50 milyona yaxın azərbaycanlı yaşayır. Azərbaycanın qərib ellərdə məskunlaşan övladları sərhədsiz dünyamızın harasında olursa-olsun, yenə Vətən deyir. Vətən onun müqəddəs adını dünyada tanıdan övladlarının əməllərində yaşayır. Təbii ki, Azərbaycanın gələcək inkişafı dünyanın müxtəlif ölkələrində yaşayan hər bir azərbaycanlının qazandığı uğurlardan da çox asılıdır. Elə buna görə də hansı ölkədə yaşamalarından asılı olmayaraq həmvətənlərimiz dövlət müstəqilliyimizin qorunub möhkəmlənməsi barədə düşünməli və bunun üçün əllərindən gələni etməlidirlər.

Sonra onuncular şeirlər, mahnılar və rəqslərdən ibarət maraqlı bədii proqramla çıxış etdilər. Nihat Heydərov, Cavid Fərzəliyev, Sevinc Cəfərova, Murad Qurbanov, İlkin Əzizli, Həsən Vəliyev, Fatimə Əmirli, Əziz Zamanlı, Güldanə Mustafayeva, Sevinc Salayeva və başqaları Ramiz Abdullayevin "Ana yurdum", "Yaşasın bütöv Azərbaycan", Nəriman Həsənzadənin "İstiqlal himni" şeirlərini, eləcə də "Bu Vətən kimin", "Anamızdır Azərbaycan", "Birləşsin əllərimiz", "Azərbaycanım", "Ey Vətən" şeir və mahnılarını ifa etdilər.

"Azərbaycanlılar və azərbaycançılıq" adlı ədəbi-bədii kompozisiyanı təqdim edən şagirdlərin çıxışlarında belə bir fikir ifadə olundu ki, müstəqil Azərbaycan Respublikası dünyada yaşayan bütün azərbaycanlılar üçün doğma Vətəndir. Hansı ölkədə yaşamasından asılı olmayaraq azərbaycanlılar öz ana dillərini, dinlərini, milli adət və ənənələrini heç zaman unutmamalıdırlar.

Hər bir azərbaycanlı fəxr etməlidir ki, onun böyük tarixə, qədim, zəngin mədəniyyətə malik Azərbaycan kimi Vətəni vardır. Hər bir azərbaycanlı bilməlidir ki, onun arxasında Azərbaycan Respublikası   kimi müstəqil bir dövlət durur.

Sonra çıxış üçün söz təhsil müəssisəsinin direktoru Qafar Hüseynova verildi. Ümummilli liderimiz Heydər Əliyevin dünyanın müxtəlif ölkələrində yaşayan soydaşlarımızın azərbaycançılıq ideyası ətrafında birləşdirilməsi və güclü diasporamızın yaradılması siyasətini hazırda ölkə başçısı cənab İlham Əliyevin uğurla davam etdirdiyini deyən Q.Hüseynov tədbir iştirakçılarını 31 dekabr - Dünya Azərbaycanlılarının Həmrəylik Günü və qarşıdan gələn Yeni il bayramı münasibətilə təbrik etdi, şagirdlərə biliklərə dərindən yiyələnməklə dərslərində böyük uğurlar qazanmağı arzuladı.

Bütün tədbir boyu informasiya-kommunikasiya texnologiyalarından geniş istifadə olundu.

Tədbirin sonunda X "ç" sinfinin şagirdləri öz arzularını səsləndirdilər: "Biz istəyirik ki, müxtəlif ölkələrdə yaşayan azərbaycanlılar həmin ölkələrin vətəndaşlarının hüquqlarına malik olsunlar. Ancaq heç vaxt öz milli köklərini, milli mənsubiyyətlərini itirməsinlər. Çünki bizim hamımızı birləşdirən tarixi köklərimiz, milli mənəvi dəyərlərimiz, milli mənsubiyyətimizdir - ədəbiyyatımız, incəsənətimiz, musiqimizdir, xalqımıza mənsub olan adət-ənənələrimizdir". 

Hicran ƏKBƏROVA