Bakı Pedaqoji Kadrların İxtisasartırma və Yenidənhazırlanma İnstitutunun beynəlxalq layihələrdə iştirakı institutun prioritet fəaliyyət istiqamətlərindəndir. İnstitut 2010-cu ildən ADU-nun baş koordinatorluğu ilə TEMPUS-RİTSA layihəsində də iştirak edir. 24-25 dekabr 2012-ci il tarixlərdə Bakı Pedaqoji Kadrların İxtisasartırma və Yenidənhazırlanma İnstitutunda adıçəkilən layihə çərçivəsində ömürboyu təhsilə (LLL) həsr olunmuş növbəti seminar-treninq təşkil edildi. Treninqdə Azərbaycan Respublikası Təhsil Nazirliyinin nümayəndələri, Azərbaycan Dillər Universiteti, Bakı Pedaqoji Kadrların İxtisasartırma və Yenidənhazırlanma İnstitutu, Naxçıvan Dövlət Universiteti, Gəncə Dövlət Universiteti və Lənkəran Dövlət Universitetinin mütəxəssisləri iştirak edirdilər.

Təlimlərin ilk günündə Azərbaycan Dillər Universitetinin əməkdaşı Yasəf Mürşüdov "RITSA layihəsi çərçivəsində ADU-da ömürboyu təhsil sisteminin yenidən strukturlaşdırılması", Naxçıvan Dövlət Universitetinin beynəlxalq əlaqələr şöbəsinin müdiri Qahirə Məmmədova "NDU-da ömürboyu təhsil", Təhsil Nazirliyinin Akkreditasiya şöbəsinin baş məsləhətçisi Aysel Ağayeva "Ali təhsil müəssisələrinin akkreditasiyası", Lənkəran Dövlət Universitetinin ingilis dili müəllimi Asudə Abdullayeva "Xarici dillərin tədrisində keyfiyyətə nəzarət" mövzularında məruzələrlə çıxış etdilər. Treninq iştirakçıları çıxışçılara məruzələrlə bağlı onları maraqlandıran suallarla müraciət etdilər, mövzular ətrafında müzakirələr aparıldı.

Tədbirin ikinci günü ADU-nun Keyfiyyətin təminatı şöbəsinin müdiri Aytən Bağırova "ADU-da keyfiyyətin təminatı", Gəncə Dövlət Universitetinin baş müəllimi Vüsal Kərimli "Ömürboyu təhsil yolunda beynəlxalq təcrübənin perspektivləri", Təhsil Nazirliyinin nümayəndəsi Sevda Abbasova "Fasiləsiz təhsil", BPKİYİ-nin xarici dillər kafedrasının müdiri Rəfiqə Əliyeva "Ömürboyu təhsil və Azərbaycanda xarici dillərin tədrisi" mövzularında çıxış etdilər.   BPKİYİ-nin xarici dillər kafedrasının müəllimi Əminə Axundova Strasburq Universitetinə səfəri zamanı tərcüməçilik sahəsində peşəkar kadrların yetişdirilməsi, onlara ali təhsil diplomlarının verilmə formaları haqqında təqdimat etdi. Çıxışlar zamanı TEMPUS-RİTSA proqramı çərçivəsində görülən işlər, aparılan islahatlar, distant təhsil, tərcüməçilik sahəsində peşəkar kadrların yetişdirilməsi yönündə icrası vacib məsələlərdən bəhs edildi. Müzakirələr zamanı həmçinin, yeni təkliflər irəli sürülərək, proqrama daxil olan ali təhsil müəssisə və qurumlarının informasiya və təcrübə mübadiləsinin vacibliyi vurğulandı.

Təlimlərin yekununda BPKİYİ-nin rektoru, professor Asəf Zamanov çıxış edərək treninqə qatılmış ali təhsil müəssisələrinin nümayəndələrinə və treninqin səmərəli təşkilinə görə xarici dillər kafedrasının müdiri Rəfiqə Əliyeva və xarici əlaqələr şöbəsinin  müdiri Sevinc Quliyevaya təşəkkürünü bildirdi. Rektor həmçinin ADU-nun rəhbərliyinə xüsusilə, professor Səməd Seyidova və dosent Jalə Qəribovaya TEMPUS layihəsinin qazanılmasında göstərdikləri səyə və uğura görə təşəkkürünü bildirdi. Jalə xanım da öz növbəsində dəfələrlə treninqlərin BPKİYİ-də keçirilməsinə yaratdığı yüksək səviyyəli şəraitə görə professor Asəf Zamanova təşəkkürünü bildirdi və layihədə partnyor ali məktəblərin nümayəndələrinə bu uğurlu əməkdaşlığın davamlı olmasını arzuladı. Eyni zamanda  növbəti treninqin NDU-da keçiriləcəyini elan etdi.

Sonda rektor, professor Asəf Zamanov TEMPUS proqramı çərçivəsində BPKİYİ-də, eləcə də regionlarda keçirilən tədbir və treninqlərdən bəhs edərək, bu tip tədbirlərin əhəmiyyətini vurğuladı. Natiq həmçinin, bu layihənin müsbət nəticələrini sadalayaraq, keyfiyyətin təminatı sahəsində gözlə görülə biləcək nailiyyətlərin varlığından danışdı. Professor Asəf  Zamanov həmçinin, 2013-cü ilin sentyabr ayında sözügedən layihənin dəstəyi ilə "Xarici dillərin tədrisində yeni tendensiyalar: mövcud təcrübə və inkişaf strategiyaları" mövzusunda beynəlxalq elmi konfransın keçiriləcəyini elan etdi. O, yüksək səviyyəli elmi konfransların keçirilməsinin əhəmiyyətindən, bu tip tədbirlərin keçirilməsi nəticəsində əldə edilmiş elmi nailiyyətlərdən söz açdı.  

Sevinc QULİYEVA,
BPKİYİ-nin Beynəlxalq əlaqələr şöbəsinin müdiri