Bakı şəhəri üzrə Təhsil İdarəsinin qərarına əsasən, paytaxtın ümumtəhsil məktəblərində "Azərbaycan tarixi fənn aylığı" keçirilir. Müxtəlif nominasiyalar üzrə keçirilən müsabiqəyə qatılan məktəblərdə tədbirlər təşkil olunur. Şagird və müəllimlərin yaradıcı işləri hazırlanır və "açıq dərs"lər dinlənilir. Bakıdakı 54 nömrəli tam orta məktəbdə də "Azərbaycan tarixi - dünənimiz, bu günümüz, sabahımız" fənn aylığı çərçivəsində "açıq dərs"lər keçirildi. Əvvəlcə qonaqlar məktəbin girişində, sinif otaqlarında  aylığın keçirilməsi barədə elanlar, plakatlar, Azərbaycan tarixinə həsr olunmuş divar qəzetləri, bülletenlər və referatlarla tanış oldular. Sonra məktəbin direktoru Sahibə Abbasova çıxış edərək iştirakçılara  fənn aylığının məqsədi və nominasiyalar barədə məlumat verdi. Bildirdi ki, məktəb bundan əvvəl keçirilən riyaziyat və Azərbaycan dili fənn aylıqlarında olduğu kimi, bu dəfə də fəallıq nümayiş etdirəcək.

Qonaqlar  tarix müəllimləri   Esmira Qasımovanın  XI "b" sinfində "Zorakı kollektivləşmə",  Tahirə Abbasovanın VIII "c" sinfində "Memarlıq və incəsənət", Fəxrəddin Hacıyevin VIII  "d" sinfində "Elm, Nəsrəddin Tusi", Zeynal Qasımovun VII "a" sinfində "Babək",  Kəmalə Atakişiyevanın VI "c" sinfində "Manna dövləti" mövzularında keçdikləri "açıq dərs"ləri dinlədilər. İştirakçılar sonra tarix müəllimi Nigar Əsədovanın yaratdığı tarix kabineti ilə yaxından tanış oldular. Onlar məktəbdə tarix aylığına həsr olunmuş işləri yüksək qiymətləndirərək müəllimlərə təklif və tövsiyələrini verdilər.  

Rəşad ZİYADOV