Böyük Azərbaycan şairı və mütəfəkkiri N.Gəncəvinin 870 illik yubileyi ilə əlaqədar Astara Pedaqoji Kollecində ədəbi-bədii kompozisiya keçirilib. Kollecin akt zalında tələbə və müəllimlərin iştirakı ilə düzənlənən tədbir dahi şairin "Sənsiz" romansının ölməz sənətkar Müslüm Maqomayevin ifası ilə açılıb. Şairin həyat və yaradıcılığından bəhs edən videoçarxa baxıldıqdan sonra kollecin dil-ədəbiyyat müəllimi Arzu Hüseynova qeyd edib ki, ölkə Prezidenti cənab İlham Əliyevin sərəncamı ilə dahi Nizaminin yubileyi ölkənin hər yerində böyük təntənə ilə qeyd olunur.

Tələbələrdən Rahim İbrahimov, Aytən Ağayeva, Ülkər Cabbarova, Elza Əfruzzadə, Ülvi Kazımov, Turan Əzizli, Aytac Şirəlizadə, Elmir Tağıyev, Elnur İbrahimov  ulu şairin əsərlərindən nümunələri əzbər söyləyib və "Xəmsə"dən müxtəlif parçalar göstərilib. Müəllimlərdən dil-ədəbiyyat müəllimi Osman Babayev və ingilis dili müəllimi Əliağa Ələkbərov çıxış edərək qeyd ediblər  ki, tarix belə dühaları hər zaman yetirmir. Belə böyük və unudulmaz simalar nadir hallarda dünyaya gəlir. Nizami təkcə Azərbaycan xalqının deyil, bütün bəşəriyyətin ən parlaq dühalarından biridir. Nizaminin əsərlərindəki dərin hikmət, gözəllik, əzəmət, insanları xoşbəxt etmək istəyi bu gün üçün də aktualdır. Nizamini yaxşı öyrənmək, onun zəngin, mənalı, müasir əhəmiyyətli irsini müxtəlif dillərə tərcümə etmək və bu irsi həm də başqa xalqların, milli mədəniyyətlərin istifadəsinə vermək gənc nəsil alim və tədqiqatçılarının, tərcüməçilərin ümdə vəzifəsi olmalıdır.

Kollecin direktoru, fəlsəfə doktoru, əməkdar müəllim Əlihəsən Həmzəyev tədbirdə çıxış edərək bildirib ki, dünyanın bütün xalqları, söz, sənət dahiləri yüz illər boyu Nizami möcüzəsini etiraf edib, Nizami zirvəsi önündə səcdəyə gəliblər. Nizami bütün zamanların qüdrətli şairi, ədəbi qalibiyyət nəhəngi, əbədiyyət dahisidir.

Sonda Azərbaycan bəstəkarı Fikrət Əmirovun anadan olmasının 90 illik yubileyinə həsr olunmuş orta ixtisas musiqi məktəblərinin tələbələri arasında keçirilən gənc ifaçıların respublika müsabiqəsində fərqlənmiş kollecin tələbələri - Raul Ağayevə və Aynurə Quluzadəyə diplomlar təqdim edilib. 

Azad ABDULLAYEV