19-28  noyabr 2012-ci il tarixlərində Zərdab rayonunda Azərbaycanın  görkəmli ziyalısı, ilk universitet təhsilli alim və müəllimi, Azərbaycan mətbuatının banisi Həsən bəy Zərdabinin xatirəsinə həsr edilmiş ənənəvi VIII  Respublika şahmat turniri keçirilmişdir.

Turnirdə 18  şəhər və rayonun 100-dən çox şahmatçısı mübarizə  aparmışdır. Turnir İsveçrə sistemi üzrə keçirilmiş və 9 tur oynanılmışdır. Beş  yaş qrupu üzrə oğlanlar və qızlar arasında qaliblər müəyyən edilmişdir. Şamaxı şahmatçıları turnirdə uğurla çıxış etmişdir. Ardıcıl 5 qələbə qazanan  şəhər 2 nömrəli tam orta məktəbin VIII sinif şagirdi Saleh Abdulrəhmanov  tək liderliyə yüksəlmişdir. Altıncı turda sinif yoldaşı, daimi idman rəqibi Niyaz Məmmədova məğlub olaraq liderliyi əldən vermişdir. N.Məmmədov turnirin sonuna kimi liderliyini saxlamış və 9 turdan 8 xal (iki  heç-heçə,  7 qələbə)   toplayaraq ümumi  turnirin  qalibi  olmuşdur. Niyaz  həm  də  14 yaşlılar arasında  birinci  olmuşdur.  Bu  yaş  qrupunda   digər  Şamaxı  şahmatçısı  şəhər  1 nömrəli tam  orta  məktəbin  VIII sinif  şagirdi Ülvi  Xudiyev 7  xal  ilə  II-III  yerləri bölüşmüşdür. Həmin  yaş  qrupunda digər  Şamaxı şahmatçısı Saleh  Abdulrəhmanov  6.5 xal  ilə IV  yeri tutmuşdur.

10  yaşa qədər  şahmatçılar  arasında  da Şamaxı  şahmatçısı, şəhər  9 nömrəli tam  orta  məktəbin  IV  sinif  şagirdi  Mənsur  Sərxanov rəqiblərini məğlub edərək 6 xal toplayaraq  birinci   yeri  tutmuşdur.

Şamaxı Avropa liseyinin V sinif şagirdi Asim Sərxanov da uğurla yarışmış,  yalnız  son  turda  Şamaxı şahmatçısı Ülvi  Xudiyevə  məğlub  olaraq   6  xal  ilə  IV yeri tutmuşdur.

Qaliblərə  diplomlar  və  xüsusi  mükafatlar  təqdim  edilmişdir.

Bir  qədər  əvvəl  Bakı  şəhərində keçirilən  şahmat  məktəbləri  komandalarının  Respublika birinciliyinin finalında çıxış edən Şamaxının  oğlanlardan  ibarət  komandası  da  uğurla  yarışmış  və  66  şahmat məktəbi arasında  V  yeri tutmuşdur. 

Asif  AĞAYEV,
Şamaxı Şahmat məktəbinin  direktoru, əməkdar müəllim