Kiçikyaşlı uşaqların sevimli jurnalı olan "Göyərçin"in 11 və 12-ci nömrələri artıq çapdan çıxıb. Jurnalın bu nömrələri öz nəfis tərtibatı, dərc olunmuş yazılarının mövzu və janr rəngarəngliyi ilə seçilir.

Dərginin 11-ci nömrəsinin 2-ci və 3-cü səhifələrində sevimli şairimiz Rafiq Yusifoğlunun 6 noyabr - Azərbaycan Televiziyası və Radiosu Gününə, 9 noyabr - Azərbaycan Dövlət Bayrağı Gününə, 6 noyabr - Bakı metrosunun işə başladığı günə (1967), 12 noyabr - Konstitusiya Gününə, 17 noyabr - Milli Dirçəliş Gününə həsr olunmuş bir-birindən maraqlı şeirləri dərc olunub.

Bu nömrədə xalq yazıçısı Hüseyn Abbaszadənin 90 illik yubileyi münasibəti ilə müəllifin kiçikyaşlı uşaqlar üçün yazdığı "Əkizlər", "Nərgiz və Nərgiz gülü" hekayələri, Mir Sabirin və özbək şairi Tursunboy Adaşbəyevin şeirləri, yazıçı Əli Vəliyevin "Babanın sevimli valı" hekayəsi, Günel Almazın "Yağış dili", "Kəpənəyin hədiyyəsi", "Çiçəklərin yuxusu" və "Ağıllı ayaqqabı", Fidan Nizaməddinqızının "Sərçənin arzusu" və "Həcc yolunda" adlı hekayələri də balaca oxucuları düşündürən mövzularda yazılmış əsərlərdir.

"Göyərçin"in 12-ci nömrəsində verilmiş şeirlər, hekayələr bərabər uşaq rəsmləri, bütün yazıları müşayiət edən şəkillər, "Təbiət guşəsi", "Özün rənglə" və s. nümunələr bu nömrənin məzmununa əlvanlıq gətirir.

İnanırıq ki, jurnalın hər iki nömrəsi balacaların çox xoşuna gələcək. 

ƏDALƏT