Azərbaycan Rəssamlıq Akademiyasında Daun sindromlu uşaqların  rəsm və əl işlərindən ibarət "Biz günəşin şəfəqləriyik" mövzusunda  sərgi açılıb. Sərgi BMT-nin "Uşaq hüquqları haqqında" Konvensiyasının Azərbaycan hökuməti tərəfindən ratifikasiya olunmasının 20 illiyinə həsr olunub. Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Hicran Hüseynova dövlət uşaq siyasətindən danışaraq xüsusi qayğıya ehtiyacı olan uşaqların hər zaman diqqət mərkəzində olduğunu diqqətə çatdırıb. Uşaqların rəsm və əl işlərini yüksək qiymətləndirən H.Hüseynova sərginin uşaqların daxili aləminin zənginliklərini təcəssüm etdirdiyini vurğulayıb.

Mədəniyyət və turizm nazirinin müavini Sevda Məmmədəliyeva, YUNİSEF-in  ölkəmizdəki nümayəndəliyinin rəhbəri  Mark Herevard, Azərbaycan Rəssamlıq Akademiyasının rektoru Ömər Eldarov ölkədə uşaqlara göstərilən dövlət qayğısından  danışaraq Azərbaycanın birinci  xanımı, Heydər Əliyev Fondunun prezidenti Mehriban Əliyevanın bu sahəyə diqqətini xüsusi vurğulayıblar. Çıxışlarda qeyd olunub ki, ölkədə uşaqların yaradıcılıq imkanlarının genişləndirilməsi, təhsili, tərbiyəsi daim  Fondun diqqət mərkəzindədir. Xüsusi qayğıya ehtiyacı olan  uşaqların reabilitasiyası daim prioritet məsələ kimi  diqqətdə saxlanılır. 

Sifai SƏFƏROVA