Ombudsman Aparatı ilə Təhsil Nazirliyinin birgə əməkdaşlığı çərçivəsində Bakı şəhərinin 11 rayonunun orta ümumtəhsil məktəblərində keçirilən uşaq hüquqları üzrə pilləli tədris sisteminə yekun vurulmuş və uşaq hüquqlarının tədrisi mərkəzlərinin yaradılmasına başlanılmışdır.

Ombudsman Aparatından AzərTAc-a bildirmişlər ki, paytaxtın 190, 150, 258, 292 və 149 nömrəli orta ümumtəhsil məktəblərində bu proqramı uğurla bitirmiş şagirdlərin və müəllimlərin təltifolunma mərasimi keçirilmişdir.

İnsan hüquqları üzrə müvəkkil Elmira Süleymanova orta ixtisas və ali təhsil müəssisələrində insan hüquqlarının tədrisinin genişləndirilməsi, ümumtəhsil məktəblərində uşaq hüquqlarının pilləli tədrisinin inkişaf etdirilməsinin nəzərdə tutulduğunu   diqqətə  çatdırmışdır. O bildirmişdir ki, uşaqların iştirakı ilə gerçəkləşdirilən, müvafiq modullar əsasında tətbiq olunan bu layihə orta məktəblərdə uşaq hüquqlarının öyrənilməsinə öz töhfəsini verməklə yanaşı, şagirdlərin bilik və natiqlik bacarıqlarının inkişaf etdirilməsində, ictimai fəallığının artırılmasında, eləcə də müvafiq fənn müəllimlərinin insan hüquqları sahəsində ixtisaslaşmasında mühüm rol oynayır. Hazırda Quba, Qusar, Lənkəran, Masallı, Füzuli, İmişli, Gəncə, Mingəçevir şəhər və rayonlarında, kənd məktəblərində bu tədris sistemi həyata keçirilir.

Mərasimdə çıxış edən məktəb direktorları, müəllimlər bu tədris sisteminin əhəmiyyəti və uşaqlara qazandırdığı bacarıqlar barədə öz fikirlərini bildirmişlər.  Tədbirlərdə şagirdlər səhnəciklər nümayiş etdirmiş, şeirlər oxumuşlar.