Naxçıvan Müəllimlər İnstitutunun Kurikulum Mərkəzində təhsil şöbələrinin inspektor və metodistlərinin fənn kurikulumlarının tətbiqi üzrə həftəlik seminarı keçirilib. Seminarda institutun rektoru, professor Oruc Həsənli və Kurikulum Mərkəzinin direktoru Rafiq Hüseynov kurikulum islahatlarının əsas xüsusiyyətləri, fənn kurikulumunun strukturu və məzmunu, məqsədi, onun təsnifatı, ümumi təhsildə yeni qiymətləndirmə mexanizmlərinin tətbiqi barədə çıxış ediblər. Vurğulanıb ki, müəllimlər institutunda tam orta məktəb müəllimlərinin ixtisasını artırmaq məqsədilə Naxçıvan Muxtar Respublikası Təhsil Nazirliyi ilə birlikdə plan hazırlanıb. Plana müvafiq olaraq hər ay fənn müəllimlərinin aylıq və qısamüddətli kurs və seminarlarının keçirilməsi planlaşdırılıb. Bu kurs və seminarlarda müəllimlərin tədrislə əlaqədar ehtiyacları nəzərə alınır, kurikulumla bağlı məsələlər müzakirə olunur, eləcə də tədrisin səmərəliliyini artırmaq üçün yaxından köməklik göstərilir.

O da diqqətə çatdırılıb ki, kurs və seminarlarda institutun bu sahə üzrə mütəxəssisləri, təcrübəli müəllimləri dərs demək üçün cəlb olunublar. Kursun sonunda kurikulum   və yeni təlim metodları ilə bağlı elektron variantlar kurs və seminarlarda iştirak edən müəllimlərə təqdim edilib. 

Naxçıvan Müəllimlər İnstitutunun Mətbuat xidməti