Naxçıvan Özəl Universitetində "Beynəlxalq Tələbə Gənclər Hərəkatı və Azərbaycan gəncliyi" mövzusunda elmi-praktik konfrans  keçirilmişdir. Konfransda tədris və elmi işlər üzrə prorektor, tarix üzrə fəlsəfə doktoru İbrahim Kazımbəyli çıxış edərək bildirmişdir ki, ümummilli liderimiz Heydər Əliyev hər zaman gənclərə  malik olduqları  qabiliyyət və intellektual imkanları  müqabilində  geniş meydan verməyin tərəfdarı idi.  

Ulu öndər gənclərlə iş məsələsini həmişə diqqət mərkəzində  saxlamış, onların sağlam böyüməsinə,  təhsilinə, həyatda layiqli yer tutmalarına  çalışmışdır. Bu siyasət bu gün ölkə başçısı İlham Əliyev tərəfindən uğurla davam etdirilir. Bunun nəticəsidir ki, gənclərimiz ictimai həyatın ən müxtəlif sahələrində öz potensiallarını  gerçəkləşdirmək imkanlarına malikdirlər. Dövlətimizin  gənclərə göstərdiyi  diqqət və qayğı  regionumuzda da ən yüksək səviyyədədir. Gəncliyə göstərilən hərtərəfli dövlət qayğısının  nəticəsidir ki,  muxtar respublika gənclərinin səsi artıq  dünyanın inkişaf etmiş ölkələrinin ali təhsil ocaqlarından gəlir. Hər il yüzlərlə gənc ən yüksək  ballarla məşhur universitetlərin tələbəsi adına layiq görülür, həyata hazırlanır, ölkəmizin adını yüksəklərə qaldırır, göstərilən etimadı doğrultmağa çalışır. Gəncliyin sağlam, vətənpərvərlik ruhunda yetişməsi, onların cəmiyyətin müxtəlif sahələrində fəal iştirakını təmin etmək üçün də regionumuzda hər cür şərait var. Son illər muxtar respublikada gənclər dövlət strukturlarına daha fəal şəkildə cəlb olunmağa başlamışlar. Artıq doğma diyarımızda bir çox məsul vəzifələrdə  gəncliyin nümayəndələri çalışaraq müstəqil dövlətin daha da möhkəmlənməsi işinə öz töhfələrini verirlər.

İ.Kazımbəyli onu da vurğulamışdır ki, bu gün Azərbaycan gəncliyi fəxr oluna biləcək səviyyədədir. Azərbaycan gəncləri ölkə daxilindəki nailiyyətləri ilə yanaşı, Azərbaycanın beynəlxalq aləmdə nüfuzunun daha da artmasında mühüm rol oynayır. Uşaq, yeniyetmə və gənclərin  fiziki, mənəvi sağlamlığı, təhsilə, informasiya texnologiyalarına yiyələnmələri istiqamətində muxtar respublikamızda daim mühüm addımlar atılır. Son illərdə yeniyetmə və gənclərin asudə vaxtlarının səmərəli təşkili üçün gənclik istirahət və əyləncə mərkəzləri, kitabxanalar, kinoteatrlar, mədəniyyət evləri, ali təhsil müəssisələrində yeni tədris korpusları, olimpiya idman kompleksləri, məktəbəqədər və məktəbdənkənar tərbiyə müəssisələrinin tikilib və ya əsaslı təmir olunaraq  istifadəyə  verilməsi də  dövlətimizin  naxçıvanlı  gənclərə ən böyük  töhfəsidir.

Tədbirdə humanitar işlər üzrə prorektor Əli Yusifovun, institutun tələbələrindən Məhəmməd Süleymanovun və Nurlan Quliyevin çıxışları dinlənilmişdir.  

Nuray ƏSGƏROVA