Azərbaycan Respublikası Təhsil Nazirliyinin Təhsil Sisteminin İnformasiyalaşdırılması İdarəsindən verilən məlumata görə, hazırda Azərbaycanın 32 ümumtəhsil məktəbində elektron jurnallardan istifadə olunur. Elektron jurnallardan istifadə edən məktəblər  "2008-2012-ci illərdə Azərbaycan Respublikasında təhsil sisteminın informasiyalaşdırılması üzrə Dövlət Proqramı" çərçivəsində həyata keçirilən "Elektron məktəb" layihəsinın iştirakçılarıdır. Layihəyə daxil olan məktəblər Bakı, Sumqayıt, Gəncə, Lənkəran, Şirvan, Şamaxı, İsmayıllı, Quba və Ağdaş şəhərlərində yerləşir. Ümumilikdə "Elektron məktəb" layihəsində 39 təhsil müəssisəsi iştirak edir.

2012-2013-cü tədris ilində Bakı və Sumqayıt şəhərlərində fəaliyyət göstərən 20 məktəbdə tam olaraq kağız jurnallardan istifadəyə son qoyulmuşdur və bu məktəblərdə yalnız  elektron jurnallar tətbiq olunur. 12 məktəbdə isə müvəqqəti olaraq elektron jurnallarla yanaşı,  kağız jurnallardan da istifadə olunur. 

Azərbaycanda ilk dəfə tam olaraq elektron jurnallara keçid 2011-2012-ci tədris ilində Bakı Avropa Liseyi və akademik Zərifə Əliyeva adına liseydə tətbiq edilmişdir.

Elekton jurnallardan istifadə edən məktəblərin sırasına bu il əlavə olaraq daha 11 məktəbin cəlb olunması nəzərdə tutulub. Yaxın illər ərzində isə əksər ümumtəhsil  müəssisələrində elektron jurnal tətbiq ediləcəkdir.  

H.ƏKBƏROVA