Azərbaycan Tibb Universitetinin idman zalında 2001-ci il təvəllüdlü və kiçikyaşlı oğlan və qızlar arasında Konstitusiya Gününə həsr olunmuş stolüstü tennis üzrə Azərbaycan birinciliyi keçirilmişdir.

Azərbaycan Stolüstü Tennis Federasiyasından bildirmişlər ki, yarışda paytaxt idmançıları ilə yanaşı Sumqayıt, Şabran, Şirvan, Şəki və Qaxdan olan tennisçilər də  qüvvələrini sınamışlar.

Şəxsi xarakter daşıyan yarışlarda oğlanlar arasında Bakı Tennis Məktəbinin təmsilçisi Sadıq Sadıqov birinci, Şabran idmançıları Nihad Məmmədov və Sənan Aslanov ikinci və üçüncü yerlərə sahib olmuşlar. Xanım tennisçilərin yarışlarında isə Bakı Tennis Məktəbinin yetirməsi Nəzakət Qarayeva bütün rəqiblərinə qalib gələrək fəxri kürsünün ən yüksək pilləsinə qalxmışdır. Şəki idmançısı Nəzrin Qafarova və  Bakı Tennis Məktəbinin tennisçisi Fatimə Məmmədli müvafiq olaraq ikinci və üçüncü yerləri tutmuşlar.

Turnirin mükafatçıları Stolüstü Tennis Federasiyası tərəfindən diplom və xatirə hədiyyələri ilə təltif olunmuşlar.