Bakı Slavyan Universitetinin Məktəb-Lisey Kompleksinin Akt  zalında Qarabağ müharibəsindən bəhs edən və tanınmış ziyalı, Milli Məclisin deputatı, jurnalist və yazıçı Aqil Abbasın eyniadlı romanının motivləri əsasında çəkilmiş "Dolu" filmi nümayiş etdirildi. Məktəb-lisey kompleksi pedaqoji kollektivinin, Şagird parlamentinin, universitetin filologiya və jurnalistika fakültələri tələbələrinin xahişi ilə baş tutan nümayişə ssenarinin müəllifi, filmin direktoru, aparıcı rolların ifaçıları, yaradıcı heyətin digər üzvləri  iştirak ediblər.

Nümayişdən öncə film haqqında, bu cür sənət nümunələrinin müasir Azərbaycan tamaşaçısı üçün vacibliyi barədə danışan BSU-nun professoru, Məktəb-lisey kompleksinin direktoru Telman Cəfərov yaradıcı heyətin məktəbə gəlişinin böyük əhəmiyyət kəsb etdiyini vurğuladı, qonaqlara minnətdarlığını bildirdi.

Yazıçı Aqil Abbas, filmin direktoru Elxan Əliyev, baş rollardan birinin ifaçısı Məmməd Səfa çıxış edərək film haqqında dolğun təsəvvür yaratmağa çalışdılar. Film nümayiş etdirildikdən sonra gənclər yaradıcı heyət üzvləri ilə xatirə şəkli çəkdirdilər. Yazıçı Aqil Abbas öz kitablarını tələbə və şagirdlərə, məktəb kitabxanasına hədiyyə etdi.  

Şakir CƏFƏROV