Bakıdakı Famil İsgəndərov adına 157   nömrəli  tam orta məktəbin   pedaqoji kollektivi üçün ötən tədris ili  uğurlu olub. Belə ki,  təhsil müəssisəsi 2011-2012-ci tədris ilində   "Ən yaxşı ümumtəhsil məktəbi" müsabiqəsinin qaliblərindən biri oldu. Müəllim və   şagird kollektivi bu yüksək mükafata və təhsilə göstərilən diqqət və qayğıya görə dövlətimizin başçısına minnətdarlığını bildirir.

Direktor Gülayə Səttarova  qeyd etdi ki, dərs ili ərzində məktəbdə bütün fənlər üzrə təhsilin keyfiyyətinin yaxşılaşdırılması məqsədilə cədvəl üzrə "açıq dərs"lər  təşkil olunub, "dəyirmi masa"lar keçirilib. Məktəbin pedaqoji kollektivi təhsillə bağlı yerli və beynəlxalq səviyyəli layihələrdə, habelə inkişafyönümlü innovativ təhsil proqramlarında fəal iştirak edir.   Çoxsaylı uğurlara imza atan müəllimlərimizin zəhməti   bəhrəsiz  qalmır. Məktəbin  istedadlı  şagirdləri tədris  ili boyunca əldə etdikləri nailiyyətləri ilə bunu təsdiqləyirlər.  Ötən  tədris ilində məktəbi bitirən məzunların böyük əksəriyyəti  yüksək balla respublikanın, eləcə də  xarici ölkələrin   ali məktəblərinə  qəbul olub.

Məktəbin şagirdləri yalnız qəbul göstəriciləri ilə deyil, həm də müxtəlif müsabiqə və yarışlarda, fənn olimpiadalarında qazandıqları uğurlarla da seçilirlər.

Təhsil ocağında istedadlı şagird və müəllimlərin əməyi isə stimullaşdırılır. Sinifdənxaric və məktəbdənkənar, o cümlədən müxtəlif tədbirlərin  təşkilində  valideynlərin iştirakı təmin edilir.

Burada  İKT-nin tətbiqi diqqətdə saxlanılır.  İstər informatika, istərsə də ayrı-ayrı fənlərin tədrisində  müəllimlər  İKT-dən  bacarıqla istifadə etməklə dərslərini kurikulumun  tələbləri səviyyəsində  keçirlər.

Direktor onu da əlavə etdi ki, hazırda qazanılan nailiyyətlərə  baxmayaraq  157 nömrəli tam orta məktəbin pedaqoji kollektivi  işə böyük  həvəslə yanaşır  və  yüksək tədris keyfiyyətinə  nail olmaq üçün beynəlxalq və ölkədaxili layihələr üzrə  gördüyü işləri daha da genişləndirir. 

Şakir CƏFƏROV