Budapeştdə keçirilən Beynəlxalq Təhsil Sərgisi işini başa çatdırmışdır. Sərginin builki iştirakçıları arasında Azərbaycan Diplomatik Akademiyası (ADA) da olmuşdur.

AzərTAc xəbər verir ki, Azərbaycanın bu yeni və nüfuzlu təhsil mərkəzini beynəlxalq miqyaslı tədbirdə ADA-nın əməkdaşı Samirə Ağayeva təmsil etmişdir.

Regionun ilk diplomatik akademiyası kimi sərgi çərçivəsində ADA-nın fəaliyyətinə böyük maraq göstərilmiş, S.Ağayevanın Budapeştin ATV televiziya kanalı ilə müsahibəsi verilmişdir.

Azərbaycanın Macarıstandakı səfirliyinin təşkilatçılığı ilə ölkənin ən böyük tədris müəssisələrindən biri olan Korvinus Universitetində bakalavr və magistrantlardan ibarət auditoriya qarşısında ADA-nın geniş təqdimatı keçirilmişdir. Təqdimat zamanı əvvəlcə Azərbaycan haqqında sənədli film nümayiş etdirilmişdir. Daha sonra ADA-nın bakalavr və magistr pillələri üzrə təhsil proqramları, təqaüd sistemi, əcnəbi tələbələrin qəbulu, akademiyanın yeni şəhərciyi və beynəlxalq əlaqələr barəsində ətraflı məlumat verilmişdir.