Bu günlərdə Biləsuvar şəhərində Azərbaycanın Milli Qəhrəmanı Mübariz İbrahimovun xatirəsinə həsr olunmuş idmanın ensin-karate növü üzrə birinci respublika çempionatı keçirilib.

Biləsuvar Rayon Təhsil Şöbəsindən aldığımız məlumatda qeyd olunur ki, Azərbaycan Ensin-Karate Federasiyasının və rayon gənclər və idman idarəsinin birgə təşkilatçılığı ilə qəhrəmanın adını daşıyan lisey-məktəb kompleksində keçirilən yarışlarda Bakı və Lənkəran şəhərləri, Astara, Salyan, Biləsuvar, Cəbrayıl, İmişli və Beyləqan rayonlarının 70-ə yaxın  yeniyetmə və gənc  idmançısı müxtəlif çəki dərəcələrində qələbə uğrunda mübarizə aparıb.

Yeniyetmələr, gənclər və böyüklər arasında keçirilən çempionatın məqsədi gənclərdə ensin-karateyə marağı artırmaq, bu idman növü üzrə dünya və Avropa çempionatlarında iştirak edəcək Azərbaycan milli komandasının heyətini formalaşdırmaqdır.

İki gün davam edən çempionatda Biləsuvar rayonunun komandası birinci, astaralı idmançılar ikinci, salyanlı karateçilər üçüncü yerləri tutublar.

Qaliblərə medallar, diplomlar və kuboklar təqdim edilib.