Gəncə Dövlət Universiteti ölkəmizin şərəfli tarixi, zəngin ənənələri olan ali təhsil müəssisələrindəndir. Fəaliyyət göstərdiyi 77 il ərzində dövrün, zamanın çətinliklərinə baxmayaraq, Azərbaycan  milli mədəniyyətinin, elminin, təhsilinin inkişafında xüsusi xidmətləri olan, müəllim kadrların yetişdirilməsində önəmli rol  oynayan universitet elm və təhsil  mərkəzi kimi formalaşıb inkişaf etmişdir. Burada yüzlərlə alim hazırlanmış, ixtisaslı, istedadlı kadrlar  yetişmişdir. Onlarla yaradıcı ziyalı, alim, ictimai və dövlət xadimləri GDU-da təhsil almışlar.

Hazırda fizika və texniki fənlər fakültəsinin  dekanı kimi fəaliyyət göstərən  dosent İldırım Qasımov da Gəncə Dövlət Universitetinin 1980-ci il məzunlarındandır. O, 1959-cu ildə vətənimizin dilbər guşələrindən sayılan Bərdə rayonunun Həsənqaya kəndində dünyaya göz açıb. 1976-cı ildə  Həsənqaya kənd orta məktəbini fərqlənmə attestatı ilə bitirib və elə həmin il GDU-nun  fizika-riyaziyyat fakültəsinə  daxil olub. Tələbəlik  illərində  universitetin ictimai işlərində  fəal iştirak edib. Sayılıb-seçilən tələbələrdən biri kimi  başqalarına nümunə göstərilib. Ali məktəbi bitirdikdən sonra  təyinatla bir müddət İsmayıllı rayonunda müəllim işləyib. 1984-cü ildə GDU-nun təlimdə texniki vasitələr laboratoriyasında əmək fəaliyyətini davam etdirməklə bərabər elmi axtarışlara başlayıb. Çox keçmədən laboratoriya müdiri, ümumi texniki fənlər kafedrasında müəllim, dissertant kimi çalışıb. AMEA-da "Sürətli yüklənmə zamanı materialların elastik və qeyri-elastik xassələrinin öyrənilməsi" mövzusunda namizədlik dissertasiyasını müdafiə edərək  alimlik dərəcəsini alıb. 2003-cü ildən 2011-ci ilə qədər GDU-nun magistratura şöbəsinin müdiri olmuşdur. 2011-ci ildə isə fizika və texniki fənlər fakültəsinə dekan seçilmişdir.

İldırım müəllim hazırda doktorluq işini yekunlaşdırmaq üzrədir. O, elektronika üzrə Koreya, Almaniya, Rusiya və Türkiyə şirkətlərinin sertifikatlarını almış, "Samsunq" LTD firmasının respublika üzrə şəxsi nümayəndəsi, xarici elektron qurğular üzrə tanınmış mütəxəssisdir.

İstedadlı alim və bacarıqlı təşkilatçı İldırım müəllimin rəhbərlik etdiyi fakültədə 4 kafedra fəaliyyət göstərir. 55 nəfər professor-müəllim heyəti  400-dən çox tələbəyə  elmin sirlərini öyrətməklə yanaşı onları müstəqil həyata hazırlayır. Ölkə başçısı cənab İlham Əliyevin  diqqət və qayğısı, şəhər rəhbərliyinin yüksək təşkilatçılığı sayəsində Gəncə Dövlət Universitetində  əsaslı təmir işləri aparılmış, fizika və texniki fənlər fakültəsinin fəaliyyət göstərdiyi korpus da zövq oxşayan görkəm almış, yeni avadanlıqlarla təchiz edilmişdir. İldırım müəllim geniş, yaraşıqlı laboratoriya və fənn otaqlarını bizə göstərdikcə sevincini də gizlətmirdi:     

- Bunların hamısı  bizim xoşbəxt gələcəyimiz olan balalarımız üçündür. Möhtərəm Prezidentimiz cənab İlham Əliyevə ürəkdən minnətdarıq ki, təhsilin inkişafı üçün  əlindən gələni əsirgəmir. Bizim üçün də, tələbələr üçün də müasir, gözəl şərait, imkanlar yaradır. Müasir avadanlıqlarla təchiz olunmuş 12 laboratoriya, fənn otaqları, gənclər otağı tələbələrin ixtiyarına verilmişdir. Bütün kafedra və laboratoriyalarda İnternet vardır. Mühazirə dərsləri İnternet, video-kompüter vasitəsi ilə keçirilir. Hər il fakültəni 70-80 nəfər tələbə bitirir.

Bu ildən təsviri incəsənət kafedrası da bu korpusa köçürülmüş və tələbələrə daha əlverişli, gözəl şərait yaradılmışdır.

Fakültənin müəllimlərinin xarici ölkələrin mətbuatında elmi məqalələri dərc olunur. Tələbələr respublikada keçirilən elmi  konfranslarda, olimpiadalarda fəal iştirak edirlər. Ötən tədris ilində dəqiq elmlər üzrə respublika olimpiadasında fakültənin tələbəsi Validə Məmmədova III  yeri tutmuşdur.

Təsviri incəsənət üzrə təhsil alan  tələbələrin mütəmadi olaraq sərgiləri təşkil  olunur, onlar şəhər tədbirlərində özlərinin sənət əsərlərini nümayiş etdirirlər.

Bu il avtomatlaşdırma  və elektrik ölçüləri üzrə  yeni laboratoriyalar və fənn otaqları yaradılmışdır.  Yeni dərs ilində fakültəyə 180 nəfər  tələbə qəbul edilmişdir. Fərəhli haldır ki, hazırda  universitetdə işləyən fizika elmləri doktoru Zirəddin Həsənov, dosentlər  Elxan İsmayılov, Yəhya Namazov, Vaqif Rüstəmov və başqaları bu fakültənin məzunlarıdır. 

İnsan o zaman sayılıb seçilir, etibar, nüfuz qazanır ki, ağır zəhmətə qatlaşıb fədakarlığı, iradəsi, qətiyyəti, zəkası ilə həyatda özünü təsdiqləyir. Ən yüksək  keyfiyyətləri ilə hörmətə-izzətə çatır, qəlbi qurub-yaratmaq, Vətənin adını ucaltmaq, elə-obaya dayaq olmaq eşqi ilə  döyünür. İldırım müəllim həmişə  doğma bildiyi insanların arasında, onların bitib-tükənməyən qayğıları içindədir. İmkansız tələbələr onun daha çox diqqətindədir. Ehtiyaclarını öyrənib onlara dayaq olanda, mənəvi  dəstək göstərəndə rahatlıq tapır.

İldırım Qasımov həm də nümunəvi ailə başçısıdır. Ömür-gün yoldaşı Rəna xanım musiqi kollecində müəllimdir. Böyük qızı İlahə ali təhsillidir. İlhamə isə anasının sənətini seçib, musiqi müəllimidir. Oğlu İbrahim Türk Liseyində təhsil  alır, kompüter mühəndisi olmaq  arzusundadır.

İldırım müəllim Vətənə, torpağa, elə, ürəkdən bağlandığı elmə, dostlarına, doğmalarına, tələbələrinə coşqun sevgi ilə yaşayır bu dünyada. Onunla söhbətimizdə zəngin dünyasını,  böyüklüyünü, əsl ziyalıya xas xüsusiyyətlərini duydum. Məsləhətləri, orijinal fikir və düşüncələri, mülahizələri ilə tələbələrinə doğru-dürüst istiqamət verir. O, ünsiyyətdə olduğu insanlara bütün varlığı ilə  bağlıdır. İldırım müəllim necə varsa, elə görünür. Sadəliyi, təbiiliyi, səmimiliyi ilə seçilir.  

Süsən TAĞIYEVA,
Azərbaycan Jurnalistlər  Birliyinin üzvü