Oktyabrın 28-də Bakıda "Hyatt Regency" otelində "ABŞ-da təhsil yarmarkası" keçirilmişdir.

AzərTAc xəbər verir ki, ABŞ Dövlət Departamenti və Bakı Təhsil Məlumat Mərkəzinin (BTMM) birgə təşkil etdikləri yarmarkanın açılış mərasimində BTMM-nin direktoru Bahar Hacızadə bildirmişdir ki, burada ABŞ-ın müxtəlif universitetlərinin nümayəndələri öz təhsil müəssisələri, təhsil proqramları barədə məlumatlar verirlər.

İştirakçılar yarmarkada ABŞ-ın 13 universiteti, o cümlədən Troy Universiteti, Pace Universiteti, Auburn Universiteti, John Cabot Universiteti barədə məlumatlar əldə etmiş, müvafiq təhsil proqramları ilə tanış olmuşlar. ABŞ universitetlərinin nümayəndələri yarmarkaya gələnlərin suallarını cavablandırmışlar. Maraqlananlar təhsil müəssisələri barədə bukletlər və digər materiallar da əldə edə bilmişlər.

Açılış mərasimində ABŞ-ın Azərbaycandakı səfirliyinin nümayəndələri iştirak etmişlər.

ABŞ Dövlət Departamenti tərəfindən dəstəklənən BTMM 1997-ci ildən fəaliyyət göstərir.