Bakıdakı Atatürk parkında Yeni Azərbaycan Partiyası (YAP) Nəsimi rayon təşkilatının təşəbbüsü ilə rayon ərazisində yerləşən ali məktəblərin yaradıcı tələbələrinin sərgisi keçirilmişdir.

 Sərgidə Azərbaycan Universitetinin (AU) tələbələri də iştirak etmişlər.  AU-dan AzərTAc-a bildirmişlər ki, tədbirdə YAP Nəsimi rayon təşkilatının sədri, Milli Məclisin deputatı Məlahət İbrahimqızı sərginin əhəmiyyətindən söz açaraq Yeni Azərbaycan Partiyasının 20 illik yubileyi münasibətilə bu cür silsilə tədbirlərin keçiriləcəyini bildirmişdir. O demişdir: "Nəzərdə tutulmuş tədbirlərin əsas hissəsi gənclərin iştirakı ilə reallaşacaqdır. Gənclərimiz çox fəal və hərtərəfli inkişaf etmişlər. Bunu nəzərə alaraq biz universitetlərdə təhsil alan istedadlı gənclərin sərgisini təşkil etmişik. Sərginin əsas məqsədi bacarıqlı, fəal gəncləri üzə çıxarmaq və onları ictimaiyyətə təqdim etməkdir. Gənclərimizə bu işdə dəstək vermək bizim borcumuzdur. İnanırıq ki, onlar sərgidən məmnun qalacaqlar".

 Azərbaycan Universiteti, Azərbaycan Dövlət Neft Akademiyası, Azərbaycan Dillər Universiteti, Bakı Slavyan Universiteti, Bakı Avrasiya Universiteti, Azərbaycan Tibb Universiteti tələbələrinin iştirak etdikləri sərgidə yaradıcı gənclərin rəsm əsərləri və əl işləri nümayiş olunmuşdur. Sərgi çərçivəsində təşkil edilmiş yarmarkada gənclərin əl işlərinin satışı da olmuşdur.