Oktyabrın 4-də Rabitə və İnformasiya Texnologiyaları Nazirliyi, Təhsil  Nazirliyi, Müəllif Hüquqları Agentliyi və Azərbaycan Milli Elmlər Akademiyasının təşkilatçılığı ilə "Azərbaycanda elm və texnologiyalar sahəsində "Thomson Reuters" agentliyi ilə əməkdaşlığın perspektivləri" mövzusunda elmi konfrans keçirildi.

Tədbirdə "Thomson Reuters" agentliyinin icraçı vitse-prezidenti Keyt Makqreqor, Mərkəzi və Şərqi Avropa ölkələri üzrə direktoru David Horki, Təhsil Nazirliyinin, Müəllif Hüquqları Agentliyinin, AMEA-nın nümayəndələri iştirak edirdi.

Konfransda Rabitə və İnformasiya Texnologiyaları Nazirliyi və "Thomson Reuters" agentliyinin "Elmi mükəmməlliyə görə" birgə mükafatlarının təqdimatı da oldu.

Akademiklər Əli Abbasov və  Fikrət Əliyev "Thomson Reuters"  agentliyinin bazasına daxil olan və impakt  faktoru alan ilk Azərbaycan  beynəlxalq elmi jurnalın ("Applied and Computational Mathematics" - "Tətbiqi və hesablama riyaziyyatı")  baş redaktorları kimi təltif edildilər.