Azərbaycan Respublikasının Prezidenti yanında Dövlət İdarəçilik Akademiyası (DİA), Azərbaycan Dövlət İqtisad Universiteti, Azərbaycan Dillər Universiteti, Azərbaycan Tibb Universiteti və Bakı Musiqi Akademiyasının tələbə gənclər təşkilatları nümayəndələrinin iştirakı ilə "dəyirmi masa" keçirilmişdir.

Dövlət İdarəçilik Akademiyasından AzərTAc-a bildirmişlər ki, bu ali məktəbdə keçirilən "dəyirmi masa" DİA tələbə gənclər təşkilatının təşəbbüsü və təşkilatçılığı ilə reallaşdırılmışdır.

Dövlət İdarəçilik Akademiyasının tədris işləri üzrə prorektoru, professor Əlikram Abdullayev, DİA həmkarlar ittifaqı komitəsinin sədri Yusif Ağayev tədbirin əhəmiyyətindən danışmışlar.

DİA tələbə gənclər təşkilatının sədri Toğrul Niyazlı tədbirdə tələbələrin müvafiq Konsepsiyanın hazırlanması zamanı təkliflərlə çıxış etmələrinin önəmli olduğunu bildirmişdir. O qeyd etmişdir ki, Azərbaycanda gənclərin ölkəmizin ictimai həyatında iştirakı üçün yaradılan hər cür şərait bu gün artıq onların respublikamızın inkişafında və gələcəyə baxışlarında rolunu daha da artırmışdır.

"Dəyirmi masa"da iştirak edən ali təhsil müəssisələrinin tələbə gənclər təşkilatlarının nümayəndələri müxtəlif təkliflərlə çıxış etmişlər.