|
|
|
Dünyanın təhsil yenilikləri |
|
|
|
|
2013-cü ilədək Ukraynanın bütün orta məktəbləri
İnternetə qoşulacaq |
|
 Ukraynanın
Təhsil və Elm, Gənclər və İdman Nazirliyi
2013-cü ilin sonlarına qədər ölkənin bütün
ümumtəhsil məktəblərini kompüterləşdirmək və
İnternet şəbəkəsinə qoşmaq niyyətindədir.
"Məktəblərin kompüterləşdirilməsi məsələsi
Ukrayna prezidentinin xüsusi nəzarəti
altındadır. Zənnimcə, 2013-cü ilin sonuna qədər
bu proqram 100 faiz yerinə yetiriləcək", - deyə
təhsil və elm, gənclər və idman naziri Dmitri
Tabaçnik bildirib. Nazirin sözlərinə görə,
2015-ci ilədək olan dövrü əhatə edən "100%
Proqramı" təsdiqlənib. "Proqram riyaziyyat və
informatika müəllimlərinin hazırlığını və bütün
orta ümumtəhsil müəssisələrinin
kompüterləşdirilməsini nəzərdə tutur", - deyə
Tabaçnik qeyd edib.
Onun sözlərinə görə, proqram, həmçinin kompüter
texnikası parkının tədricən yeniləşdirilməsini
və ölkənin bütün məktəblərinin ümumdünya
İnternet şəbəkəsinə qoşulmasını nəzərdə tutur. |
| |
|
Uşaqlara vaxtından əvvəl məktəb proqramı tədris
olunmamalıdır |
|
 Rusiya
Təhsil Akademiyasının Yaş Fiziologiyası
İnstitutunun professoru Maryana Bezrukix hesab
edir ki, uşaqlar məktəbə hazırlıq prosesində
məktəb proqramını keçməməlidirlər. Əks halda bu
kompleks problemlərin yaranmasına gətirib
çıxaracaq.
Bir çox müəllimlər məktəbdə təhsil almazdan öncə
uşaqlara maksimum bilik verməyə çalışır və
hazırlıq məşğələlərində birinci və hətta ikinci
sinif proqramlarını keçir. Bu cür təlim gələcək
şagirdə oxu və yazı kimi baza bacarıqlarının
mənimsənilməsində problemlərlə üzləşmək
təhlükəsi yaradır. "RİA Novosti" agentliyinin
təşkil etdiyi "Müəllim və valideyn: ümumi iş
üçün qarşılıqlı anlaşma" adlı onlayn konfransda
iştirak edən M.Bezrukix qeyd edib: "Məktəb
yaşına çatmamış uşaq birinci, xüsusi ilə də
ikinci sinif proqramını öyrənməyə hazır deyil.
Hətta müəllimlər və valideynlər hesab etsələr
ki, uşaq yüksək intellektual inkişafa malikdir,
funksional olaraq o buna hazır deyil".
Ekspertin sözlərinə görə, bir sıra tədqiqatlar
təsdiq edir ki, məktəbəqədər təlim
tələskənliyinin yaratdığı problemləri sonradan
həll etmək çətin olur. "Həm də bu problemlər
yazı və oxu kimi baza bacarıqlarının
formalaşması ilə bağlıdır", - deyə Bezrukix
əlavə edib.
Mütəxəssis vurğulayıb ki, hər bir müəllimin
riayət etməli olduğu məktəbəqədər hazırlıq
proqramları mövcuddur və bu vəziyyətdə
özfəaliyyətlə məşğul olmaq yolverilməzdir. |
| |
|
ABŞ bəzi təhsil göstəricilərinə görə İqtisadi
Əməkdaşlıq və İnkişaf Təşkilatının digər
üzvlərindən geri qalır |
|
 Amerika
Birləşmiş Ştatları orta təhsil pilləsini başa
vuranların say nisbətinə və məktəbəqədər təhsil
göstəricilərinə görə, İqtisadi Əməkdaşlıq və
İnkişaf Təşkilatına (İƏİT) digər üzv ölkələrdən
geri qalır.
İqtisadi Əməkdaşlıq və İnkişaf Təşkilatı - 2012
"Təhsilə baxış" hesabatına əsasən, ABŞ-ın
təhsilin inkişafı sahəsində həyata keçirdiyi
tədbirlər üzrə göstəricisi İƏİT-ə üzv digər
ölkələrin orta göstəricilərindən aşağıdır.
Belə ki, 2010-cu ildən etibarən ABŞ-da
şagirdlərin orta məktəbi bitirmə üzrə
göstəricisinin sabit (77 faiz) qalmasına
baxmayaraq, ölkə bu göstərici ilə 34 ölkə
arasında 22-ci yerdə qərarlaşıb. İƏİT-ə üzv
digər 21 ölkədə bu göstərici 84 faiz təşkil
edir.
Fransa, Hollandiya, İspaniya və Belçikada isə 4
yaşadək uşaqların məktəbəqədər təhsil
müəssisələrinə qəbul göstəricisi 100 faiz olduğu
halda, ABŞ-da bu göstərici 69 faizdir.
ABŞ-da orta məktəb müəllimləri digər kollec
təhsilli şəxslərlə müqayisədə 72 faiz çox gəlir
əldə edir. İƏİT-in bir çox ölkəsində bu
göstərici 90 faiz təşkil edir. Bəzi ölkələrdə
isə fərqlər daha yüksəkdir. Məsələn, İspaniyada
müəllimlər digər ali təhsilli şəxslərdən 138
faiz çox əməkhaqqı alır. Buna baxmayaraq, bu
göstəricinin daha aşağı olduğu ölkələr də var.
Məsələn, Slovakiyada bu nisbət 45 faizdir.
Hesabata əsasən, ABŞ-da aşağı təhsilli
valideynlərin övladları digər ölkələrlə
müqayisədə təhsil pillələrini daha çətinliklə
adlayırlar. ABŞ bu cür ailələrdən olan kollec
şagirdlərinin sayına görə 34 ölkə arasında 26-cı
yerdə qərarlaşır. Bu göstəriciyə görə, ilk yeri
İslandiya tutur.
Hesabatda göstərildiyi kimi, ABŞ-da kollec
məzunları digər ölkələrlə müqayisədə daha çox
gəlir əldə edirlər. Belə ki, ABŞ-da orta
təhsilli şəxslərə nisbətən kollec məzunları ildə
təxminən 19000 dollar çox gəlir əldə etdiyi
halda, digər İƏİT ölkələrində bu göstərici
nisbətən aşağıdır. ABŞ-dan sonra 18000 dollarla
Lüksemburq və 15500 dollarla Çexiya Respublikası
qərarlaşır. Böyük Britaniya, Avstriya və
Hollandiyada bu fərq 12000 dollar, İƏİT-in digər
üzv ölkələrində isə 8900 dollar təşkil edir.
Qeyd edək ki, İqtisadi Əməkdaşlıq və İnkişaf
Təşkilatı Avropa İqtisadi Əməkdaşlıq
Təşkilatının varisidir. Avropa İqtisadi
Əməkdaşlıq Təşkilatı (AİƏT) 1947-ci ildə
yaradılıb. AİƏT-in varisi İqtisadi Əməkdaşlıq və
İnkişaf Təşkilatı ABŞ-ın təşəbbüsü ilə təsis
olunub. Təşkilatın yaradılması haqqında
konvensiya 1960-cı il dekabrın 14-də imzalanıb
və 1961-ci il sentyabrın 30-da bütün üzv
dövlətlər tərəfindən ratifikasiya edildikdən
sonra qüvvəyə minib. Hazırda təşkilat 34 üzv
ölkəni əhatə edir. |
| |
|
Daha dörd universitet nüfuzlu Rassel Qrupuna
daxil olub |
|
2012-ci ilin martında daha dörd aparıcı ali
təhsil müəssisəsi - Darem Universiteti, Ekseter
Universiteti, Kuin Meri London Universiteti və
York Universiteti Rassel Qrupuna üzv olub. Qeyd
edək ki, Rassel Qrupu ən yaxşı tədqiqatlar
həyata keçirən, yüksək səviyyəli təhsil və
təcrübə verən, biznes və dövlət sektoru ilə
mükəmməl əlaqələrə malik, hazırda Böyük
Britaniyanın 24 ali təhsil müəssisəsini
birləşdirən bir qurumdur.
Rassel Qrupuna daxil olan digər ali məktəblər
bunlardır: Birminqem, Bristol, Kembric, Kardiff,
Edinburq, Qlazqo, Lids, Liverpul, Mançester,
Nyukasl, Nottingem, Oksford, Şeffild,
Sauzəmpton, Uorvik, Belfast Kral
universitetləri, London İmperial, London Kral,
London Universitet kollecləri və London
İqtisadiyyat Məktəbi.
Rassel Qrupunun qərargahı London şəhərində
yerləşir və qrupa Lids Universitetinin
vitse-kansleri professor Maykl Artur rəhbərlik
edir. Qrup 1994-cü ildə yaradılıb və universitet
rəhbərlərinin iştirak etdiyi tədbirlərin təşkil
olunduğu Rassel meydanındakı Rassel otelinin
şərəfinə adlandırılıb. Rassel Qrupu hökumət,
parlament, eləcə də digər nüfuzlu orqanlar
qarşısında qrupa üzv olan ali məktəblərin
maraqlarını təmsil etmək məqsədi ilə yaradılıb.
Rassel Qrupu ali təhsil sahəsində bir neçə ən
böyük adların nümayəndələrindən biridir. Çox
zaman bu qrupu ABŞ-ın nüfuzlu Sarmaşıq Liqasının
Britaniya variantı kimi də qiymətləndirirlər.
Hazırda Böyük Britaniya universitetlərinin
əksəriyyəti "missiya qrupları" adlandırılan
qurumlardan birinə daxildir. Bu cür "missiya
qrupları" ali təhsil siyasətinin və
marketinqinin bir hissəsinə çevrilib. Böyük
Britaniyada fəaliyyət göstərən digər qurumlardan
1994 Qrupunu və Oldviç Qrupunu qeyd etmək olar.
Darem, Ekseter, Kuin Meri London və York
universitetləri əvvəllər üzvü olduqları 1994
Qrupunu tərk edərək Rassel Qrupuna daxil
olublar.
Hər hansı bir universitetin Rassel Qrupuna üzv
olması həmin ali məktəbdə təhsil haqqının
artmasına səbəb olur. Bu, xüsusilə gəlirli
əcnəbi tələbə bazarında mövqeləri
möhkəmləndirmək baxımından əhəmiyyətlidir.
|
| |
|
İnformatika üzrə Beynəlxalq olimpiada 2016-cı
ildə Kazanda keçiriləcək |
|
 Tatarıstanın
İnformasiyalaşdırma və Rabitə Nazirliyinin rəsmi
saytı məlumat verib ki, 2016-cı ilin iyulunda
informatika üzrə Beynəlxalq olimpiada Kazanda
keçiriləcək.
Olimpiada iştirakçıları 2013 Universiada
Kəndində qalacaqlar. Olimpiadanın Kazan
IT-parkında keçirilməsi planlaşdırılır. Lakin
2016-cı ilədək Tatarıstanda İnnopolisin (Kazan
yaxınlığında IT-şəhər, bu şəhərin tikintisinə
2012-ci ilin yayında başlanılıb) tikinti
layihəsi reallaşdırılarsa, olimpiada bu ərazidə
təşkil olunacaq.
Tatarıstan Respublikası İnformasiya
Texnologiyaları Mərkəzinin direktoru Tatyana
Kamaletdinova bildirib: "Kazan informatika üzrə
Beynəlxalq olimpiadanı qəbul edən ilk Rusiya
şəhəri olacaq. Tatarıstan nümayəndə heyəti
İtaliyanın Lombardiya vilayətində keçirilən
informatika üzrə XXIV Beynəlxalq olimpiada
çərçivəsində Kazanın ərizəsini təqdim edib".
T.Kamaletdinova qeyd edib ki, 2011-ci ildə
yarışlar Tailandda, 2012-ci ildə isə İtaliyada
keçirilib. 2013-cü ildə olimpiadanı Avstraliya,
2014-cü ildə Çin, 2015-ci ildə isə Qazaxıstan
qəbul edəcək. T.Kamaletdinovanın sözlərinə
görə, bu il informatika üzrə Beynəlxalq
olimpiadada 87 ölkədən milli seçimlərin
qalibləri olmuş 400 şagird iştirak edib. Yeri
gəlmişkən, bu il informatika üzrə Ümumrusiya
olimpiadası məhz Kazan şəhərində keçirilib və
seçimlər nəticəsində İtaliyaya göndərilmiş
nümayəndələrin dördü də qızıl medal qazanıb.
Rusiya komandası ümumi nəticələrə görə Çinlə
birlikdə birinci yeri bölüşüb.
Hazırladılar:
Lamiyə ƏLİYEVA,
Leyla HEYDƏROVA |
|
|
|
|
|
|
|
|
|
|
|
|
|
|
|
|
