Azərbaycan Diplomatik Akademiyası (ADA) Koreya Respublikasının Hankuk Xarici Dillər Universiteti ilə anlaşma memorandumu imzalamışdır.

ADA-dan AzərTAc-a bildirmişlər ki, memoranduma əsasən, hər iki ali təhsil ocağı əməkdaşlığı və tərəfdaşlığı genişləndirmək və möhkəmləndirmək, gələcəkdə birgə təlim və tədris proqramlarını həyata keçirmək üçün qarşılıqlı fəaliyyət quracaqdır. Bu fəaliyyətlə bağlı konkret təkliflər də daxil edilən rəsmi sənədi ADA-nın rektoru, xarici işlər nazirinin müavini Hafiz Paşayev və Hankuk Xarici Dillər Universitetinin prezidenti Park Çul imzalamışlar.

Park Çul Azərbaycan Diplomatik Akademiyasının nümayəndə heyətini gələn ilin əvvəlində ölkəsinə səfərə dəvət etmişdir.

Koreya Respublikasının nümayəndə heyəti, həmçinin Azərbaycan Diplomatik Akademiyasının bu yaxınlarda istifadəyə verilən yeni tədris kompleksi ilə tanış olmuşdur.