Beynəlxalq Humanitar Forum çərçivəsində Bakıda səfərdə olan Amerika astrofiziki, ABŞ-ın Massaçusets Texnologiya Universitetinin məzunu, Kaliforniya və Paris universitetlərinin professoru, Nobel mükafatı laureatı George Fitzgerald Smootun Naxçıvan Dövlət Universitetinin müəllim və tələbələri ilə online görüşü oldu. AMEA İnformasiya Texnologiyaları İnstitutu ilə videobağlantı nəticəsində reallaşan görüşdə universitetin rektoru, akademik İsa Həbibbəyli məşhur alimi salamlayaraq Nobel mükafatının bəşəriyyətin ən böyük intellektual zənginliklərini əks etdirən bir mükafat olduğunu xatırlatdı. Universitet haqqında ətraflı məlumat verən rektor bildirdi ki, dünyanın aparıcı təhsil ocaqları ilə, o cümlədən Amerika universitetləri ilə əməkdaşlıq edən bu ali məktəb dəqiq elmlər üzrə mütəxəssislərin yetişməsi, nanotexnologiya və innovasiyaların tətbiqi, distant təhsil, virtual əlaqələr istiqamətində əhəmiyyətli uğurlar qazanıb.

AMEA İnformasiya Texnologiyaları İnstitutunun direktoru, professor Rasim Əliquliyev və Azərbaycan Respublikasının Prezidenti yanında Ali Attestasiya Komissiyasının sədrinin müavini, AMEA-nın müxbir üzvü, tanınmış fizik Vəli Hüseynov Azərbaycanda elmin inkişafına, intellekt potensialına, müasir informasiya texnologiyalarının tətbiqinə göstərilən diqqət və qayğıdan danışdılar, məşhur amerikalı astrofizikin həyat və yaradıcılığı, elmi nailiyyətləri barədə məlumat verdilər.

Sonra Nobel mükafatı laureatı George Fitzgerald Smoot fizika fakültəsinin müəllim və tələbələrinə "Qalaktikanın aktual astrofiziki problemləri" mövzusunda online mühazirə oxudu. Mühazirədə təxminən 13,7 milyard il əvvəl Böyük Partlayış (Big Bang) nəticəsində kainatın yaranması, əvvəli və sonu, mikrodalğalı fon şüalanması, astrofizika elminin son yenilikləri barədə məlumatlardan bəhs olundu. Sonda Nobel mükafatçısı, görkəmli alim Naxçıvan Dövlət Universitetinin müəllim və tələbələrinin suallarını cavablandırdı.  

Mehriban SULTAN,
NDU-nun Mətbuat şöbəsinin müdiri