|
 Sentyabrın
20-də Təhsil Problemləri İnstitutunun Kurikulum
Mərkəzində təhsil proqramlarının (kurikulumların)
tətbiqi ilə bağlı müvafiq sənədlərin hazırlanması barədə
məsələ müzakirə edilmişdir.
Təlimatlar hansı xarakterdə olmalıdır? Nələri əhatə
etməlidir? Onların üslubu necə olmalıdır? və s. bu kimi
məsələlər tədbir iştirakçıları tərəfindən ətraflı
müzakirə olunmuşdur.
Tədbirdə çıxış edən beynəlxalq məsləhətçi Alex (Andru)
Crisian dünyanın müxtəlif ölkələrində kurikulumların
tətbiqi ilə bağlı yazılmış təlimatlara istinad edərək
fikirlərini nümunələrlə əsaslandırmışdır. Qeyd etmişdir
ki, kurikulumların səmərəli həyata keçirilməsi üçün
təlimatların yazılması vacibdir. Təlimatlar öz
yığcamlığı və bütün müəllimlər tərəfindən aydın başa
düşülməsi ilə seçilməlidir. Təlimatlar özündə təhsil
proqramlarının (kurikulumların) əhatə etdiyi
məsələlərin şərhinə yönəldilməlidir. Onların necə tətbiq
olunması, necə idarə olunması, qiymətləndirilməsi və s.
məsələlər əhatə edilməlidir. Beynəlxalq məsləhətçi
bunlarla yanaşı, təlimatların xarakteri, hansı
hissələrdən ibarət olması, kim tərəfindən koordinə
olunması, yazılması və eləcə də nə vaxt yazılması
məsələlərini də diqqət mərkəzində saxlamışdır.
Müzakirə zamanı bildirilmişdir ki, müxtəlif ölkələrin
təlimatları nəzərdən keçirilməli və Azərbaycan
Respublikasının təhsil sisteminə uyğun olanlar seçilib
götürülməlidir. Təlimatların mümkün variantları
hazırlanmalı və onun hansı formada yazılıb, tərtib
olunması qərara alınmalıdır. Alex (Andru) Crisian onu da
qeyd etmişdir ki, noyabr ayında artıq bu məsələ öz
həllini tapmalıdır.
Kurikulum Mərkəzinin direktoru Ənvər Abbasov tədbirdə
çıxış edərək bildirmişdir ki, Azərbaycan təhsil
sistemində təlimatların hazırlanması sahəsində kifayət
qədər təcrübə vardır. Lakin məktəb kurikulumu üçün
tamamilə yeni formada təlimatların yazılması vacibdir.
Bu təlimatlar ümumi təhsil pilləsinin ayrı-ayrı
səviyyələrinə və ya təhsilin bütün səviyyə və
pillələrinə aid ola bilər. Bunlar təbii ki, irəli
sürülən təkliflərdir və müzakirələr zamanı vahid qərara
gəlinməlidir ki, təlimatlar necə yazılsın. Bununla
yanaşı, həmçinin təlimatların hansı növdə olması da
müzakirə olundu. Onların hazırlanması zamanı ümumi
pedaqoji və fənlər üzrə xüsusiyyətlərin nəzərə alınması
xüsusi olaraq qeyd edildi.
Şəfa KAZIMOVA,
Təhsil Problemləri İnstitutunun elmi işçisi |
