Sentyabrın 21-də Bakıdakı 229 nömrəli tam orta məktəbdə beynəlxalq  sülh  günü münasibətilə "Mən sülhə səs verirəm" adlı tədbir keçirildi. İştirakçılar əvvəlcə tədbirin proqramına uyğun olaraq şagirdlərin əl işlərindən ibarət  fotosərgi ilə tanış oldular. Sonra qonaqlar "açıq dərs"lərdə iştirak etdilər. Məktəbin akt zalında təşkil olunmuş tədbiri giriş sözü ilə açan direktor Fəridə Bağırova sülh günü barədə geniş məlumat verdi. Bildirdi ki, Azərbaycanda sülhün, əmin-amanlığın bərqərar olunmasında ulu öndər Heydər Əliyevin xidmətləri böyükdür. Məhz onun siyasəti nəticəsində müstəqilliyin ilk illərində ölkəmizdə hökm sürən hərc-mərcliyə, özbaşınalığa son qoyuldu və 1994-cü ildə Qarabağ müharibəsində atəşkəs elan edildi.

Tədbirin aparıcıları sülh göyərçinlərini uçuraraq müharibənin ağır fəsadları barədə məlumat verdilər. Onlar dünya ölkələrini sülhə, əmin-amanlığa çağırdılar. Yuxarı sinif  şagirdləri   "Müharibə olmasın", "Müharibə istəmirəm" və müharibəyə aid başqa şeirləri ifa etdilər. VII "b" sinif şagirdləri "Biz torpaqlarımızı tezliklə azad görəcəyik" adlı şeirlə tədbir iştirakçılarının diqqətini cəlb etdi.

Çıxış edən qonaqlar da müharibənin ağır bəlalarından danışaraq xalqımıza həmişə  sülh, dinclik şəraitində yaşamağı arzuladılar. Tədbirin sonunda Xocalıya həsr olunan  film nümayiş olundu.

Rəşad ZİYADOV