Bu günlərdə "Təhsil" Respublika İdman Mərkəzinin direktor müavini, əməkdar bədən tərbiyəsi və idman xadimi İbrahim Məmmədovdan aldığımız məlumatda bildirilir ki, 28 avqust - 6 sentyabr tarixlərində Quba rayon Uşaq-Gənclər Şahmat Məktəbində "Təhsil" Respublika İdman Mərkəzinin şahmat üzrə Respublika çempionatı keçirilib.

Çempionatın keçirilməsində əsas məqsəd şahmat idman növünə məktəblilərın marağının daha da artırılması, şahmatın inkişaf etdirilməsi haqqında Dövlət Proqramının icrası və 2013-cü ildə Serbiya və Yunanıstanda məktəblilər arasında keçiriləcək Avropa və Dünya çempionatlarına vəsiqə qazanmaqdır.

Respublika çempionatında ölkəmizin şəhər və rayonlarından 289 şahmatçı - 195-i oğlan, 94-ü isə qız olmaqla hər biri ayrılıqda 6 yaş qrupunda mübarizə aparıb.

İsveçrə sistemi ilə 9 turdan ibarət keçirilən çempionatda  6 yaş qrupu üzrə birinci yeri tutan 6 oğlan və 6 qız şahmatçı məktəblilər arasında Dünya, ikinci yeri tutan 6 oğlan və 6 qız isə Avropa çempionatlarına vəsiqə qazanıb. 7- 17 yaşlı şahmatçılar arasında  Bakı, Sumqayıt şəhərlərindən, Quba, Neftçala, Biləsuvar və Ucar rayonlarından olan oğlan və qızlar 1, 2 və 3-cü yerləri tutublar.

Yarışın təntənəli açılış və bağlanış mərasimlərində Təhsil Nazirliyinin, "Təhsil" Respublika İdman Mərkəzinin, Azərbaycan Şahmat Federasiyasının və Quba rayon rəhbərliyinin nümayəndələri iştirak ediblər.

Qaliblər Təhsil Nazirliyinin müvafiq dərəcəli medalları, diplomları və hədiyyələri ilə təltif olunublar. 

ƏDALƏT