|
 Uşaq
və yeniyetmələrin istedad və qabiliyyətlərinin aşkara
çıxarılması və inkişaf etdirilməsi bu gün təhsildə
aparılan islahatların prioritet istiqamətlərindən
biridir. Təhsil ocaqlarında onların potensial
imkanlarının inkişaf etdirilməsi və səmərəli təhsil
almaları üçün hər cür şərait yaradılıb. Haqqında söhbət
açmaq istədiyim istedadlı yeniyetmələrdən biri Atabala
Manafzadə Xırdalan şəhər 4 nömrəli tam orta məktəbin IX,
Uşaq Musiqi Məktəbinin VII sinif şagirdidir. Azərbaycan
Respublikasının Prezidenti İlham Əliyev cənablarının
29 mart 2012-ci il tarixdə imzaladığı "Gənc
istedadların xüsusi təqaüdə layiq görülməsi haqqında"
Sərəncamı ilə Atabala Manafzadənin adı Azərbaycanın
gənc istedadlarının "Qızıl kitabı"na yazılmaqla o,
xüsusi aylıq təqaüdə layiq görülüb.
Bu yüksək mükafatdan ruhlanan Atabala dərslərini əla
oxumaqla bərabər, musiqi təhsilini də uğurla davam
etdirir.
Atabala Manafzadə 1998-ci ildə Bakıda anadan olub.
2005-ci ildə Xırdalan şəhər Uşaq Musiqi Məktəbinin
fortepiano şöbəsinin I sinfinə daxil olub. O, məktəbin
Qara Qarayev adına Dövlət Kamera Orkestrinin müşayiəti
ilə keçirilən konsertlərdə çıxış edib. 2009-cu ildə
"Gənc pianoçuların II respublika müsabiqəsi"ndə I
dərəcəli, 2010-cu ildə Polşanın Azərbaycandakı
səfirliyi və Azərbaycan Respublikası Mədəniyyət və
Turizm Nazirliyi tərəfindən təşkil olunan "Uşaq və
Gənclər üçün F.Şopen müsabiqəsi"ndə II dərəcəli
diplomlara layiq görülüb. 2011-ci ildə Vladimir
Spivakov xeyriyyə fondunun keçirdiyi "Moskva dostları
qarşılayır" adlı VIII beynəlxalq festivala dəvət alıb
və ölkəmizi yüksək səviyyədə təmsil edib. Həmin il
Üzeyir Hacıbəyli adına BMA-nın və Macarıstanın
Azərbaycandakı səfirliyinin birgə təşkil etdiyi F.
Listin 200 illiyinə həsr olunmuş gənc pianoçuların
festivalında uğurlu çıxışına, Şirvan şəhərində
Azərbaycan Respublikası Mədəniyyət və Turizm Nazirliyi
tərəfindən keçirilən "İstedadlı uşaqlar" respublika
müsabiqəsində fəal iştirakına görə diplomlarla
mükafatlandırılıb. Belqrad şəhərində IX " Davorin
Jenko" beynəlxalq müsabiqəsində ilk dəfə olaraq iki
yaş kateqoriyasında yarışaraq I dərəcəli mükafat və
Fəxri laureat adı qazanıb. Türkiyənin İstanbul
şəhərində keçirilən VII "Pera Piano" beynəlxalq
müsabiqəsində Atabala I dərəcəli diplom və həm də
A.Skryabinin əsərinin ən yaxşı ifaçısı nominasiyasının
qalibi adına layiq görülüb.
Azərbaycan Respublikası Mədəniyyət və Turizm
Nazirliyinin və Bakı şəhər Musiqi Məktəbləri Direktorlar
Şurasının təşkil etdiyi konsertlərin fəal iştirakçısı
olan Atabala Manafzadə deyir ki, beynəlxalq
müsabiqələrdə iştirak etmək onun çoxdankı arzusu olub.
Mədəniyyət və Turizm Nazirliyinin bu müsabiqəyə onu
göndərmək istədiyini biləndə sevincinin hədd-hüdudu
olmayıb. Amma bu səfərin məsuliyyətini də dərindən dərk
edib.Ona görə də öz üzərində çox çalışıb. Serbiyada
keçirilən müsabiqədə Y.Haydnın, V.A.Motsartın, F.Listin,
R.Şumanın, Qara Qarayevin, Türkiyədə isə K.Çerni,
İ.S.Bax, A.Skryabin, Ü.C.Erkinin əsərlərini ifa edib.
- Mən qazandığım bütün uğurlara görə üzərimdə əməkləri
olan müəllimlərimə, məni müsabiqələrə hazırlayan
Kamilla Əmirovaya təşəkkür edirəm. Ən başlıcası ölkə
rəhbərinə və onun xanımına istedadlı gənc və
yeniyetmələrə göstərdikləri diqqət və qayğıya görə
minnətdarlığımı bildirirəm.
Sifai SƏFƏROVA |
