İnsan yalnız öz kimliyini, hansı xalqa, hansı torpağa  məxsus olduğunu, öz gücünü, qüdrətini dərk etdiyi halda  qəhrəmanlıq, igidlik nümayiş etdirə bilər. Belə olan halda  onu seçdiyi yoldan heç kim döndərə bilməz, əgər  bu inad onu ölümə doğru aparsa belə. O ki qaldı olümə, ölüm özü də  bəzən son görüş, son vida olmur, fiziki  ölüm  mənəvi ölməzliyə, əbədi yaşantıya  körpü seçilir. Məhz buna görə də "vətəni basılmayan  igidin xatirəsi unudulmaz", - deyirlər.

Göyçə mahalının Basarkeçər  rayonunun Nərimanlı kəndində  5 aprel 1969-cu ildə  dünyaya göz açan  Şövqiyar Abdullayev də belə qəhrəmanlardandır. 1986-cı ildə doğma kəndi Nərimanlıda orta məktəbi bitirən bu gənc  qəbul olunduğu Azərbaycan Dövlət Politexnik İnstitutunun (indiki  Azərbaycan Texniki Universiteti) yalnız birinci kursunu qurtara bilib və hərbi xidmətə çağırılıb. 1989-cu ildə hərbi xidməti  Monqolustanda, tank qoşunları tərkibində başa vuran Şövqiyar təhsilini  yenə də sona qədər davam etdirə bilməyib.  Belə ki, 1992-ci ildə bu vətənpərvər gənc könüllü olaraq  Milli  Orduya yazılıb. O, döyüş bacarığına  və tank  mütəxəssisi olduğuna görə Ağdamdakı  tank briqadasına komandir təyin olunub. Şövqiyarın qəhrəmanlığa aparan, sonda onu əbədiyyətə qovuşduran  döyüş yolu  beləcə başlayıb... Haqqında qısaca  məlumat verdiyimiz Azərbaycanın Milli Qəhrəmanı  Şövqiyar Abdullayev haqqında  oxuculara təqdim etdiyimiz "Şövqiyar" adlı bu kitab rəşadətli döyüş yolu keçən igid Vətən oğlunun  göstərdiyi  şücaətlərdən, Papravənd, Pircamal, Aranzəmin, Dranbon və digər kəndlərin düşmən tapdağından azad olunması  uğrunda gedən ağır döyüşlərdə  düşmənə endirdiyi sarsıdıcı zərbələrdən bəhs edir. "Zəfər qalası" qəzetinin baş redaktoru, tədqiqatçı jurnalist Natella Asenanın ürək ağrısı, eyni zamanda qürur hissi ilə qələmə aldığı  bu kitab hər bir oxucunu Şövqiyar itkisi ilə  kövrəltdiyi qədər Şövqiyar ölməzliyi qədər də  qürrələndirir. Bir daha əmin olursan ki, Şövqiyar kimi, Mübariz kimi, yüzlərlə, minlərlə igid, mərd, cəsur oğulları ilə öyünən  Azərbaycanın ayrılmaz hissəsi olan  Qarabağ heç vaxt düşmən tapdağında qalmayacaq. 

Sifai  SƏFƏROVA