|
 Artıq
bir həftəyə yaxındır ki, yeni - 2012-2013-cü dərs ili
başlayıb. Bu münasibətlə həmkarlarımı, ölkəmizin təhsil
sistemində çalışanları təbrik edirəm.
Dünyada elə peşə var ki, onun dəyəri olduqca
qiymətlidir. Bu peşə qaranlıqları nura boyayan,
gələcəyin alimlərini, həkimlərini yetişdirən, ağla,
düşüncəyə aydınlıq bəxş edən bir peşədir. Bu, müəllimlik
peşəsidir.
Müəllim dühası üçün meyar tapmaqda acizlik çəkirəm.
Düşünürəm ki, maddi və mənəvi aləmdə heç bir ehtişam,
heç bir əzəmət, heç bir qüdrət müəllim üçün meyar ola
bilməz. Sarayların naxışını, həyatın simfoniyasını,
lövhələrin solmazlığını, dastanların nəğməsini, sözünü
yazan şairin, sənətkarın, memarın, elə bəstəkarın özünü
də kim yetişdirir, kim onları ərsəyə çatdırır? Əlbəttə
ki, müəllim... Bu gün mən çox xoşbəxtəm. Xoşbəxtəm ki,
bütün qəlbimlə, bütün ruhumla müəlliməm.
Möhtərəm Prezidentimiz İlham Əliyevin "Müasir dünyada
bilik və yeni texnologiyalar olmasa, uğur qazanmaq
mümkün deyil" fikri bütün ixtisas sahibləri kimi biz
müəllimlərin də fəaliyyətini istiqamətləndirir.
Kollektivimiz yeni dərs ilinə inamla başlayıb.
Məktəbimiz yenicə təmirdən çıxıb, otaq və dəhlizlər göz
oxşayır. Bu gözəllik, bu səliqə-sahman insanın ruhunu
dincəldir, onu mənəvi cəhətdən sakitləşdirir.
Dövlətimizin təhsilə qayğısı danılmazdır. Keçirilən bir
sıra islahatlar, o cümlədən kurikulum islahatı
təhsilimizin gələcəyindən xəbər verir. Bu il
məktəbimizdə beşinci siniflərdə dərs deyəcək bütün
müəllimlər kurslara getmiş və müvafiq sertifikatlar
almışlar. Demək olar ki, məktəbimiz yeni tədris
ilinə tam hazırlıqlı başlayıb.
Elə xatirələr var ki, onu ömürdən uca bilirsən.
Sentyabrın 15-i hər il bizə bu ucalığı yaşadır. Biz
müəllimlər üzümüzə dikilmiş o çaşqın, o min bir sual
dolu gözləri, onlara qaranlıq qalan məqamları
işıqlandıranda özümüzü xoşbəxt hiss edirik. Şam işığı
xoşbəxt olur qaranlıqda...
Beş ildən artıqdır ki, ölkəmizdə "Ən yaxşı müəllim"
müsabiqəsi keçirilir. Bu müsabiqənin keçirilməsinin çox
böyük əhəmiyyəti var. Müəllim özünü həm maddi, həm də
mənəvi cəhətdən qüvvətli hiss etsə, bu, təhsildə də öz
əksini tapar. Bu il mən də bu müsabiqənin 100 qalibindən
biri oldum. Bu, ilin yaddaqalan ən əlamətdar hadisəsi
oldu mənim üçün. Məktəbimizin direktoru Kəmalə xanımın
isə sevincinin hədd-hüdudu yoxdur. Çünki bu il
məktəbimizin iki müəllimi - Sevinc Məcidova və bir də
mən bu müsabiqənin qalibi olmuşuq. Bütün kollektivimizi
bu uğur münasibəti ilə təbrik edirəm. Qoy belə
uğurlarımızın sayı gündən-günə çoxalsın. Qoy təhsilimiz
gündən-günə çiçəklənsin! Arzularımız həmişə çin
olsun!..
Həcər BƏŞİROVA,
Bakıdakı 164 nömrəli məktəbin
Azərbaycan dili və ədəbiyyat müəllimi |
