Sentyabrın 15-də Azərbaycan Müəllimlər İnstitutunda "Bilik günü" və 2012-2013-cü tədris ilinin başlanması münasibətilə tədbir keçirildi. Tədbirdən əvvəl AMİ-nin professor-müəllim heyəti, qonaqlar və tələbələr institutun Heydər Əliyev Mərkəzini ziyarət etdilər  və ulu öndərin büstü önünə əklil qoydular.

İnstitutun rektoru, Milli Məclisin deputatı, professor Aqiyə Naxçıvanlı çıxış edərək yeni dərs ilinin başlanmasının mühüm ictimai-siyasi hadisə və hər bir ailənin həyatında əlamətdar mərhələ olduğunu bildirdi. Rektor təməli ulu öndərimiz Heydər Əliyev tərəfindən qoyulan təhsil, gənclər siyasətinin Prezident cənab İlham Əliyev tərəfindən bu gün də uğurla davam etdirildiyini vurğuladı.

Professor A.Naxçıvanlı Azərbaycan Müəllimlər İnstitutunun professor-müəllim heyətinin və müasir standartlara cavab verən tədris korpusunun, yataqxana binasının yeni dərs ilində tələbələri qarşılamağa tam hazır olduğunu tədbir iştirakçılarının  diqqətinə çatdırdı. 2012-ci ildə AMİ və onun filiallarına ümumilikdə 1788 tələbə qəbul olunmuşdur. Rektor  "Bilik günü" münasibətilə bütün müəllim həmkarlarını, tələbələri təbrik etdi, onlara uğurlar, sürətlə inkişaf edən dövlətimiz, millətimiz adına gözəl nailiyyətlər əldə etməyi arzuladı.

Dövlət himni səsləndirildikdən sonra institutun təhsilin idarə edilməsi və peşə təlimi kafedrasının müdiri, professor Ramiz Məmmədzadə çıxış edərək müəllim və tələbələri təbrik etdi, onlara şərəfli müəllim peşəsinə yiyələnməyin əhəmiyyətindən söz açdı. Bu gün cəmiyyətdə vətənpərvər, savadlı gənclərin yetişdirilməsində müəllimlərin üzərinə düşən böyük vəzifələr haqqında danışdı, tələbələrə öz tövsiyələrini çatdırdı.

Daha sonra tədbirdə çıxış edən məzunlar, yüksək balla instituta qəbul olmuş birinci kurs tələbələri və valideynlər öz sevinclərini bölüşdülər, yüksək təhsil almaq üçün yaradılan şəraitə görə institutun rəhbərliyinə minnətdarlıqlarını bildirdilər.

Sonda yüksək balla instituta qəbul olmuş bir qrup gəncə tələbə bileti təqdim edildi.