Yeni dərs ilinin səciyyəvi xüsusiyyətlərindən biri də cari ildən respublikanın ümumi təhsil müəssisələrinin V siniflərində də təhsilin Milli Kurikuluma əsasən təşkil olunmasıdır. Təhsil naziri Misir Mərdanovun müvafiq əmrinə əsasən ümumi orta təhsil səviyyəsi üzrə fənn kurikulumlarının tətbiqi ilə əlaqədar 2012/2013-cü tədris ilində V siniflərdə dərs deyəcək müəllimlərin siyahısı müvafiq təhsil qurumları tərəfindən Kurikulum Mərkəzinə təqdim edilmiş, treninqlərin keçiriləcəyi baza müəssisələri müəyyənləşdirilmişdir. Bu ilin iyul-sentyabr aylarında Bakı şəhəri  üzrə 5 min müəllimin kurikulum təlimlərində iştirakı təmin edilmişdir.

 "İnkişaf" Elmi Mərkəzi tərəfindən Təhsil Nazirliyi və Dünya Bankının dəstəyi ilə təşkil olunan təlimlərdə mən də iştirak edirdim. Avqustun 27-dən sentyabrın 9-dək V sinif şagirdlərinə dərs deyəcək müəllimlərin təlimi layihəsinin II mərhələsi Xəzər rayonundakı 181 nömrəli məktəbdə həyata keçirildi.

İştirakçısı olduğum treninqin məqsədi yeni fənn kurikulumlarının səmərəli tətbiqini təmin etmək idi. Burada Bakının müxtəlif məktəblərindən gəlmiş 31 müdavim iştirak edirdi. Təlimi Kurikulum Mərkəzinin  əməkdaşı Xuraman Qaraisayeva aparırdı. Dərslər kurikuluma əsasən keçilir, fəal (interaktiv) təlim üsulları ilə - təqdimat, kiçik və böyük qruplarla iş və  müzakirələr aparılır, dərsin aparılmasının  videoyazısı nümayiş etdirilirdi. Təlim  çox maraqlı, diskussiya şəklində keçirilirdi. Hər bir təlim otağının zəruri texniki vasitələrlə-kompüter, noutbuk və  proyektorla təchiz olunması dərsləri daha dolğun və əyani şəkildə mənimsəməyimizə kömək edirdi.

Qeyd edim ki, dərslərin belə maraqlı, canlı və yaddaqalan keçməsində təlimçi Xuraman müəllimin xüsusi əməyi vardır. O, öz tələbkarlığı və səmimiliyi ilə ilk gündən biz müəllimlərin sevgisini qazandı. X.Qaraisayeva biliklərini böyük səy və bacarıqla, səbrlə bizlərə öyrədir və müəllimlərlə işləməkdən böyük zövq aldığını bildirirdi. Yeni tədris metodu ilə bağlı verdiyimiz sualları isə dönə-dönə ətraflı şəkildə izah edirdi.

Təlimin doqquzuncu günündə müəllimlər müxtəlif mövzularda "açıq dərs"lərin icmalını disk formasında yazıb təqdimat keçirdilər. Sonuncu gün isə müdavimlər 15 sualdan ibarət test sorğusunda iştirak edib kurs müddətində öyrəndiklərini nümayiş etdirdilər. Hər kəs yığdığı bala uyğun I və ya II dərəcəli sertifikat aldı.

İnanırıq ki, kurikulum islahatları qarşıdan gələn illərdə də davamlı şəkildə məzmun və mahiyyət etibarilə inkişaf edərək məktəblərdə daha geniş tətbiq olunacaqdır. Bunu bizdən zaman tələb edir. 

Samirə DADAŞOVA,
C.Nurməmmədov adına 108 nömrəli tam orta məktəbin dil-ədəbiyyat müəllimi