Bu günlərdə Daşkəsən rayonundakı Nəsimi adına 1 nömrəli tam orta məktəbin dil-ədəbiyyat müəllimi, əməkdar müəllim Rəna Aslanovanın redaksiyaya ünvanladığı məlumatda bildirilir ki, ölkəmizin hər yerində olduğu kimi bizim rayonda da təşkil olunan fənn kurikulumunun tətbiqi üzrə təlim kursları V sinifdə dərs deyəcək müəllimlərin hazırlanmasında mühüm əhəmiyyətə malik oldu.

Azərbaycan dili və ədəbiyyat fənni üzrə Təhsil və İnkişaf Mərkəzi tərəfindən həyata keçirilən təlim kurslarında iştirak etmiş müəllimlər çox böyük razılıq edirlər. Ona görə ki, avqustun 13-dən 25-dək davam edən kurs biz müəllimlərin peşəkarlıq səviyyəsinin artmasında həlledici rol oynadı.

Təlim kursunda 10 gün ərzində  müəllimlər ənənəvi təlimlə fəal təlimin müqayisəsini daha dərindən öyrənib, nəticədə fəal təlimin üstünlüyünü bir daha yəqin etdilər. Onu da öyrəndik ki, interaktiv təlim şagirdi daha çox tədqiqatçılığa, axtarışlara, yaradıcı olmağa, idraki bacarıqlarını üzə çıxarmağa sövq edir.

Kurs müddətində proqram üzrə nəzəri materialların praktiki vərdişlərlə üzvi şəkildə əlaqələndirilərək öyrədilməsi  müəllimlərin bu sahədə bilik səviyyəsinin artmasında çox böyük rol oynadı. Eyni zamanda hər birinin qrup şəklində birgə əməkdaşlığı, maraqlı, canlı dərs nümunələri hazırlaması, yeni pedaqoji yanaşmalardan istifadə etməsi kursun ən yaddaqalan məqamları oldu.

 Məlumatın sonunda  diqqətə çatdırılır ki, bu təlim kursunu başa çatdıran hər bir müəllim V sinifdə öz dərsini daha maraqlı qurmaq üçün müxtəlif yollar axtaracaq, yaradıcı olacaq, interaktiv təlim metodlarından, İKT-dən bəhrələnərək öz iş üsulunu daim təkmilləşdirəcəkdir. R.Aslanova eyni zamanda rayonun bütün təhsil işçiləri, təlimin iştirakçıları adından kursun təşkilatçılarına və icraçılarına, xüsusən də təlimçilərə öz dərin minnətdarlığını bildirir.