M.V.Lomonosov adına Moskva Dövlət Universitetinin Bakı filialının tələbələrinin "Azərikimya" İstehsalat Birliyində (İB) növbəti istehsalat təcrübəsi yekunlaşmışdır. Bu münasibətlə birliyin rəhbərliyinin tələbələrlə görüşü olmuşdur.

İB-nin mətbuat xidmətindən AzərTAc-a bildirmişlər ki, görüşdə "Azərikimya" müəssisələrinin fəaliyyəti, müasir texnologiyanın tətbiqi, neft-kimya sənayesinin perspektivləri, o cümlədən yeni yaradılmaqda olan Sumqayıt Kimya Sənaye Parkı, regionda ilk azot gübrəsi - karbamid, yerli xammal əsasında fəaliyyət göstərəcək polipropilen zavodları haqqında geniş məlumat verilmişdir.

Dialoq şəklində keçən görüşdə kimya sənayesi üçün prioritet olan daha bir məsələ - müasir tələblərə uyğun yaradılan yeni istehsalat sahələrini bacarıqla idarə edə biləcək kadrların hazırlanması ilə bağlı da söhbət aparılmışdır. Bildirilmişdir ki, birliyin rəhbərliyi respublikanın ali təhsil müəssisələrində kimyaçı-mütəxəssislərin yüksək səviyyədə hazırlığına, neft-kimya sənayesinə perspektivli gənclərin cəlb edilməsinə xüsusi diqqət yetirir.

Görüşdə tələbələri maraqlandıran suallar cavablandırılmışdır.

 Tələbələr istehsalat təcrübəsinin səmərəli təşkilinə görə birliyin rəhbərliyinə təşəkkür etmişlər.