Qax rayonunda yeniyetmə və gənclər üçün "Azərbaycan doğma diyarımdır" adlı növbəti vətənpərvərlik təmayüllü yay istirahət düşərgəsi təşkil edilmişdir. Rayonun İlisu kəndində yerləşən "Ulu" istirahət mərkəzində təşkil olunan düşərgədə Qax da daxil olmaqla respublikamızın müxtəlif bölgələrindən 60 yeniyetmə və gənc istirahət edir.

Yay istirahəti dövründə yeniyetmələrə Azərbaycanın tarixi və coğrafiyası haqqında geniş məlumatlar verilməklə yanaşı, onlar üçün rayonun tarixi abidələrinə, görməli yerlərinə ekskursiyalar təşkil edilir. Bundan başqa, yeniyetmə və gənclərin asudə vaxtlarının daha  səmərəli və maraqlı keçməsi məqsədi ilə düşərgədə vətənpərvərlik mövzusunda  inşa yazı, şeir, mahnı müsabiqələri təşkil olunur, dama, nərd, şahmat, voleybol, futbol və digər idman növləri üzrə yarışlar da keçirilir. Qeyd edək ki, avqustun 8-dən başlayan yay istirahət düşərgəsi bu ayın sonunda başa çatacaq. 

Samirə HÜSEYNQIZI