Rayon təhsil şöbəsinin metodisti A.Məmmədovadan aldığımız məlumatda bildirilir ki, rayonun ümumtəhsil məktəblərinin V siniflərində dərs deyəcək müəllimlərin təlim kursları davam edir. Həmin kursların lazımi səviyyədə təşkili üçün şəhər 1, 2, 3, 4, 5 və Qaxbaş kənd 2 nömrəli tam orta məktəblərində texniki avadanlıqlarla təchiz edilmiş təlim mərkəzləri yaradılmışdır. Eyni zamanda təlimlərin yüksək səviyyədə aparılması üçün mərkəzlərə təhsil şöbəsinin əməkdaşları da cəlb edilmişdir.

Təlim kurslarını tarix fənnindən Təlim və İnkişaf Mərkəzi, xarici dil fənnindən "XXI əsr" Beynəlxalq Təhsil və İnnovasiya Mərkəzi, riyaziyyat və informatika fənlərindən "Mədəd-Azərbaycan" təşkilatı, Azərbaycan dili və ədəbiyyat, texnologiya, musiqi və təsviri incəsənət fənlərindən isə Odlar Yurdu Universitetinin əməkdaşları aparır.

Rayon üzrə bu il V siniflərdə dərs deyəcək 464 nəfər müəllim kursdan keçməlidir. Hazırda 8 fənn üzrə 380 müəllim təlim kurslarından keçmişdir. Hər fənn üzrə 10 gün davam edən təlim kurslarının səmərəli keçməsində həm təlim rəhbərləri, həm də fənn müəllimləri xüsusi fəallıq göstəriblər. Həmin fənn müəllimləri təlim kurslarında öyrəndikləri materiallar üzrə imtahan verərək müxtəlif dərəcəli sertifikatlar alıblar.

Hazırda isə fiziki tərbiyə və həyat bilgisi fənləri üzrə təlim kursları yüksək səviyyədə aparılır. Məşğələlər sentyabrın 3-nə kimi davam edəcək. Sonra 84 nəfər müəllim də imtahan verərək müxtəlif dərəcəli sertifikat alacaqdır. 

Ə.DAŞDƏMİRLİ