Avqustun 22-də Bakıda yeniyetmələr arasında keçirilən dünya çempionatında sərbəst güləşçilərin yarışlarına yekun vurulmuşdur.

AzərTAc xəbər verir ki, Heydər Əliyev adına İdman-Konsert Kompleksində keçirilən yarışın ikinci günü 46, 54, 63, 76 və 100 kiloqram çəki dərəcəsində sərbəst güləşçilər mübarizə aparmışlar.

Yarışda Zavur Uquyev (46 kq, Rusiya), Hacımurad Rəşidov (54 kq, Rusiya), Zain Retherford (63 kq, ABŞ), Əbdülrəşid Sədullayev (76 kq, Rusiya) və Georgi Qoqayev (100 kq, Rusiya) fəxri kürsünün ən yüksək pilləsinə qalxmışlar.  Azərbaycan pəhləvanları Səid Həmidov (100 kq) gümüş, Məhəmmədhüseyn Həsənov (54 kq) və Məhəmmədhacı Muxutov (76 kq) isə bürünc medal qazanmışlar. Qeyd edək ki, Azərbaycanın sərbəst güləşçiləri dünya çempionatında 2 qızıl, 3 gümüş və 3 bürünc medala sahib olmuşlar.   Avqustun 23-də mübarizəyə qadın güləşçilər qoşulmuşlar.