Böyük Britaniyanın paytaxtı Londonda XXX Yay Olimpiya Oyunlarında iştirak etmiş Azərbaycan idmançıları Vətənə qayıtmışlar.

AzərTAc xəbər verir ki, Londonda Azərbaycanın idman tarixinə yeni parlaq səhifələr yazmış olimpiyaçıları Heydər Əliyev adına Beynəlxalq hava limanında onların ailə üzvləri, idman ictimaiyyətinin nümayəndələri, paytaxt sakinləri böyük təntənə ilə, gül-çiçəklə, musiqi sədaları altında qarşılamışlar.

***

XXX London Yay Olimpiya Oyunlarında iştirak etmiş Azərbaycan idmançıları Heydər Əliyev adına Sarayın qarşısındakı parkda ulu öndərin abidəsini ziyarət etmişlər.

AzərTAc xəbər verir ki, idmançılarımız maşın karvanının müşayiəti ilə hava limanından birbaşa Heydər Əliyev adına Sarayın qarşısındakı parka gələrək müstəqil dövlətimizin memarı və qurucusu, Azərbaycanda bədən tərbiyəsi və idmanın inkişafına, gənc nəslin sağlam və vətənpərvərlik ruhunda böyüməsinə daim böyük diqqət və qayğı göstərmiş ulu öndərin xatirəsini ehtiramla anmış, onun abidəsi önünə əklil və gül dəstələri qoymuşlar.

Qeyd edək ki, London Olimpiya Oyunlarında Azərbaycan idmançıları 10 medal qazanmışlar. Azərbaycanın olimpiya yığması bu göstərici ilə 205 ölkə arasında 30-cu olmuşdur.