Azərbaycan Respublikası Prezidenti yanında Dövlət İdarəçilik Akademiyası və Qafqaz Universitetinin 13 tələbəsi bu il iyulun 2-dən 13-dək Türkiyə Respublikasının Samsun Böyükşəhər Bələdiyyəsində 2 həftəlik təcrübə proqramı keçiblər. Qafqaz Universitetinin Mətbuat xidmətindən verilən məlumata görə, Azərbaycandan gəlmiş tələbələrlə görüşən Samsun Böyükşəhər Bələdiyyəsinin başçısı Yusuf Ziya Yılmaz belə fəaliyyətlərin iki qardaş ölkə adına çox faydalı olduğunu qeyd edərək, gələcəkdə də bu əlaqələrin davam etdiriləcəyini bildirib, onlara müvəffəqiyyətlər arzulayıb. Azərbaycanlı tələbələr Samsun Böyükşəhər Bələdiyyəsinin başçısı Yusuf Ziya Yılmaza ölkəmizin milli tarixini özündə əks etdirən hədiyyələr təqdim edərək belə bir imkanı yaratdıqlarına görə öz səmimi təşəkkürlərini bildiriblər. 

Tələbələr iki həftə müddətində bələdiyyənin nəzdində fəaliyyət göstərən 5 şöbədə istehsalat təcrübələri keçiblər. Eyni zamanda Samsun   Böyükşəhər Bələdiyyəsində həftədə iki dəfə toplanan bələdiyyə məclisinin iclasında da müşahidəçi kimi iştirak ediblər. Təcrübədən əlavə həftə sonunda tələbələrimizin Samsun şəhərinin tarixi məkanlarını gəzmək imkanı da olub. Təcrübənin sonunda tələbələrin təcrübə dəftərləri yoxlanılaraq qeydiyyata alınıb və onlara sertifikatlar təqdim olunub. Samsuna bağlı olan Bafra Bələdiyyə başçısı Zihni Şahinin qəbulunda da olan tələbələr təcrübənin son günündə Bafra Bələdiyyəsinin fəaliyyətləri ilə tanış olublar.  

Y.ƏLİYEV